Historike: Transplantimi i parë i suksesshëm i fshikëzës

Kirurgët amerikanë kryen me sukses transplantimin e parë historik të fshikëzës njerëzore më 4 maj 2025.

Procedura e ndërlikuar tetë-orësh përfshinte marrjen e veshkës dhe fshikëzës nga një dhurues organesh dhe rigjallërimin e tyre në trupin e një pacienti që i kishte humbur organet për shkak të sëmundjes së veshkave dhe kancerit, raporton KosovaPress.

“Veshka filloi menjëherë të prodhonte një sasi të madhe të urinës dhe funksioni i veshkave të pacientit u përmirësua menjëherë. Pas operacionit, nuk kishte nevojë për dializë dhe urina derdhej siç duhet në fshikëzën e re”, tha urologia Nima Nassiri nga Universiteti i Kalifornisë – Los Anxhelos.

Menjëherë pas kësaj, pacienti ishte në gjendje të urinonte normalisht, diçka që nuk kishte mundur ta bënte për shtatë vjet. Duke marrë parasysh miliona njerëz në mbarë botën që kanë një lloj dëmtimi të fshikëzës, kjo arritje e jashtëzakonshme mund të ndryshojë shumë jetë.

“Ky operacion përfaqëson një moment historik në mjekësi dhe mund të ndikojë në mënyrën se si ne trajtojmë pacientët e përzgjedhur me kujdes me fshikëza “terminale” shumë simptomatike që nuk funksionojnë më,” shpjegon urologu Inderbir Gill i Universitetit të Kalifornisë Jugore.

“Transplantimi është një opsion trajtimi që shpëton jetën dhe përmirëson jetën për shumë kushte që prekin organet kryesore, dhe tani ne mund të shtojmë fshikëzën në këtë listë.”

Deri më tani, e vetmja mundësi për pacientët me fshikëza të dëmtuara rëndë ka qenë përdorimi i një seksioni të zorrëve për të marrë përsipër funksionin e fshikëzës.

Marrësi i fshikëzës, Oscar Larrainzar, bashkëshort dhe baba i katër fëmijëve, kishte humbur më parë të dy veshkat dhe pjesën më të madhe të fshikëzës së tij.

Mesatarisht, fshikëza e meshkujve mund të mbajë deri në 700 mililitra lëngje, por ajo që ka mbetur nga ajo e Larrainzarit mund të mbajë vetëm 30 mililitra. Duke lidhur disa vena dhe arterie përpara se të vendosnin organin e dhuruesit, kirurgët ishin në gjendje ta thjeshtonin pak procedurën.

“Pacienti është mirë dhe ne jemi të kënaqur me ecurinë e tij klinike deri tani”, thotë Gill.

Mjekët po planifikojnë katër operacione të tjera si pjesë e një prove klinike të transplantimit të fshikëzës.