Hoti premton mbështetje për gastronomët dhe shitësit me pakicë

 

 

Kryeministri Avdullah Hoti, takoi sot përfaqësuesit e Shoqatës së Gastronomëve dhe të Rrjetit të Shitësve me Pakicë, të cilëve ju premtoi vazhdimin e mbështetjes financiare me masa konkrete të Qeverisë.

Hoti në këtë takim shpalosi pakon e re të mbështetjes në vlerë prej 200 deri 220 milionë euro për tre mujorin e parë të vitit 2021, ku midis tjerash përfshihet edhe zbritja e TVSH-së nga 18% në 8 % për këtë vit, masa këto të parapara me Ligjin për Rimëkëmbje Ekonomike.

Sipas komunikatës së Zyrës së Kryeministrit, përfaqësuesit e Shoqatës së Gastronomëve dhe ata të Shoqatës së Shitësve me Pakicë, kërkuan nga Hoti rishikimin e mundësisë për zgjatjen e orarit të punës si dhe ndryshime në mënyrën e shpërndarjes së pakos së re të ndihmës për bizneset për vitin 2021.

Në këtë takim u theksua rëndësia e vazhdimit të bashkëpunimit dhe koordinimit midis Qeverisë dhe komunitetit të biznesit, me qëllim që pasojat e pandemisë COVID-19 të përballohen më lehtë.

Ndryshe, Kuvendi i Kosovës është mbledhur për të votuar Projektligjin për Rimëkëmbje Ekonomike./21Media