Hoti: Prishtina për katër vjet ka mësuar si nuk duhet qeverisur

Hoti ka thënë se Prishtina në këto katër vite ka mësuar më së miri se si nuk duhet të qeveriset

Kandidati për kryeministër nga koalicioni LDK-AKR-Alternativa, Avdullah Hoti, gjatë një takimi të hënën me Degën e Tretë të LDK-së, ka thënë se Prishtina në këto katër vite ka mësuar më së miri se si nuk duhet të qeveriset, ndërsa ka premtuar se koha e gazit lotsjellës, molotovit dhe dëmtimit të pronës publike nuk do të përsëritet pas fitores së 11 qershorit.

Ai ka thënë se qeveria e tij ka bërë shumë punë të mira, por nuk ka bërë zhurmë dhe as pompozitet, pasi punët e mira i shohin më së miri qytetarët, të cilët me votën e lirë vendosin për të ardhmen pa krim dhe korrupsion.

Kryetari i LDK-së, Isa Mustafa ka thënë se LDK është model se si qeveriset shteti, si respektohen institucionet dhe si ruhet pasuria publike, ndërsa kryetari i Degës së Tretë të LDK-së, Hazir Borovci ka thënë se kjo Degë me të drejtë quhet Dega e Ibrahim Rugovës.

Ai ka thënë se kandidati për kryeministër Avdullah Hoti, gjatë pozitës së tij të nënkryetarit të Prishtinës, së bashku me kryeministrin Mustafa i kanë vënë themelet e zhvillimit të kryeqytetit, andaj ka shfaqur besimin se ky sukses do të përsëritet edhe nga qeveria e re e drejtuar nga Avdullah Hoti në nivel të Kosovës.