Hoti: Qeveria emëron anëtaren e Bordit të OSHP-së, pa konkurs publik

Ish-kryeministri Avdullah Hoti ka adresuar kritika ndaj Qeverinë e Kosovës për vendimet që lidhen me prokurimin si dhe emërimin e një anëtare në Bordin e Organit Shqyrtues të Prokurimit (OSHP).

Ai ka shkruar ka shkruar Qeveria nuk pyet për ligj apo praktika të mira të vendimmarrjes.

“Siç raportohet nga tri organizata të shoqërisë civile, Qeveria e ka emëruar një anëtare të Bordit të OSHP-së pa konkurs të hapur. Kuvendi e ka miratuar këtë pa asnjë kundërshtim, siç është bërë praktikë. Disa qeveri me radhë kanë nënshkruar marrëveshje me Ambasadën Britanike, ku bordet dhe udhëheqësit e institucioneve të pavarura përzgjidheshin përmes konkursit publik, pavarësisht si definohej në ligj. Kjo praktikë e mirë kishte për qëllim zgjedhjen e profesionistëve në këto institucione vitale të shtetit”, ka shkruar Hoti.

Ai ka bërë thirrje Zyrës Kombëtare të Auditimit që t’i auditojë në detaje rastet.

“Kjo praktikë u hodh poshtë pa asnjë hezitim nga qeveria që ” promovon transparencën dhe drejtësinë”!!!
E vërteta është se: (i) tenderët njëburimorë, (ii) pagesa e avanceve për shpenzime kapitale dhe (iii) mbyllja për publikun e procedurave të prokurimit janë tri problemet kryesore në prokurim gjatë mandatit të kësaj qeverie. Këto probleme potencialisht mund të kushtojnë miliona euro për buxhetin e Kosovës.
Unë pres që Zyra Kombëtare e Auditimit t’i auditojë në detaje të gjitha këto raste dhe t’i prezantojë të gjeturat në raportet audituese për 2023, të cilat duhet të publikohen së shpejti.”, ka përfunduar ai./21Media