Hyjnë në fuqi sanksionet australiane ndaj Rusisë

Ndalimet Australiane të udhëtimit dhe sanksionet e synuara financiare kundër presidentit rus, Vladimir Putin dhe anëtarëve të lartë të qeverisë së tij janë tani në fuqi. Këtë e konfirmoi kryeministri i vendit Scott Morrison në një deklaratë të hënën.

“Nga mesnata e mbrëmshme, sanksionet financiare të synuara nga Australia dhe ndalimet e udhëtimit hynë në fuqi për Presidentin rus dhe anëtarët e mbetur të përhershëm të Këshillit të Sigurimit të Rusisë: Ministrin e Jashtëm Sergei Lavrov, Ministrin e Mbrojtjes Sergey Shoigu, Kryeministrin Mikhail Mishustin dhe Ministrin e Punëve të Brendshme Vladimir Kolokoltsev. ”, thuhet në një deklaratë nga zyra e Morrison.

Qeveria australiane është zotuar gjithashtu të sigurojë pajisje ushtarake, furnizime mjekësore dhe ndihmë financiare për të mbështetur Ukrainën, si dhe të kontribuojë me 3 milionë dollarë amerikanë në Fondin e Mirëbesimit të NATO-s për Ukrainën.

“Detajet e kontributit të Australisë për pajisjet ushtarake vdekjeprurëse janë duke u punuar me partnerët tanë dhe do të shpallen së shpejti,” tha zyra e Morrison.

Qeveria Morrison më parë ishte angazhuar vetëm për dërgimin e pajisjeve ushtarake jo-vdekjeprurëse në Ukrainë.

Australia ka sanksionuar tani më shumë se 350 individë rusë dhe 13 individë dhe entitete bjelloruse, përfshirë ministrin bjellorus të Mbrojtjes Viktor Khrenin, që kur Rusia pushtoi Ukrainën javën e kaluar.

SHBA, së bashku me Komisionin Evropian (KE), Francën, Gjermaninë, Italinë, Britaninë e Madhe dhe Kanadanë, njoftuan të shtunën se do të dëbojnë disa banka ruse nga SWIFT, rrjeti financiar i sigurisë së lartë që mundëson transferimin e qetë dhe të shpejtë të para globalisht.

Të hënën, zyra e Morrison tha se Australia do të “ndërmerrte hapa plotësues sipas nevojës”, për të bllokuar hyrjen e Rusisë në SWIFT. /21Media