Izraeli dhe Siria bien dakord për armëpushim
Siria dhe Izraeli kanë rënë dakord për një armëpushim, njoftoi të premten ambasadori i SHBA-së në Turqi, Tom Barrack.
Marrëveshja u “përqafua” nga Turqia, Jordania dhe vendet e tjera fqinje, tha ambasadori, i cili shërben gjithashtu si i dërguari special i SHBA-së në Siri, në një postim në X.
“U bëjmë thirrje druzëve, beduinëve dhe sunitëve që të ulin armët dhe së bashku me pakicat e tjera të ndërtojnë një identitet të ri dhe të bashkuar sirian në paqe dhe prosperitet me fqinjët e tyre”, tha Barrack, raporton CNN.
Armëpushimi vjen pasi Izraeli nisi sulme ajrore në Siri të mërkurën, të cilat sipas Izraelit kishin për qëllim mbrojtjen e druzëve, një pakicë fetare arabe . Përleshjet midis forcave pro-qeveritare dhe druzëve kanë vrarë dhjetëra njerëz që nga rënia e diktatorit të hershëm të Sirisë, Bashar al-Assad.
Sulmet ajrore të Izraelit në Damask shënjestruan disa ndërtesa qeveritare, ndërsa autoritetet thanë se të paktën tre persona u vranë. Një video nga një kanal televiziv sirian tregoi ndërtesën e Ministrisë së Mbrojtjes duke u goditur drejtpërdrejt në transmetim, duke e detyruar prezantuesin të fshihej.
Ndërkaq presidenti sirian Ahmed al-Sharaa tha të mërkurën në mbrëmje sipas kohës lokale se ushtria siriane filloi tërheqjen nga Suwayda, ku shpërthyen përleshje gjatë fundjavës midis milicisë Druze dhe fiseve beduine, duke bërë që forcat qeveritare të ndërhynin. Qeveria e Al-Sharaa njoftoi gjithashtu një armëpushim të ri me fraksionet Druze.
SHBA-të kanë shprehur shqetësim për tensionet në rritje dhe kanë bërë një përpjekje diplomatike së fundmi për të zgjidhur konfliktin.
Sekretari i Shtetit i SHBA-së, Marco Rubio, zhvilloi një telefonatë me Ministrin e Jashtëm turk, Hakan Fidan, të premten për të diskutuar çështjen, sipas një njoftimi të ministrisë së jashtme turke për bisedën telefonike.
Rubio tha më parë të mërkurën në mbrëmje se të gjitha palët në konflikt kishin rënë dakord për “hapa specifikë” për të zgjidhur situatën.