Izraeli nuk do t’i shesë armë Ukrainës

Ministri i Mbrojtjes i Izraelit, Benny Gantz, ka përsëritur se vendi nuk do t’i shesë armë Ukrainës, pavarësisht një kërkese të re zyrtare nga Kievi për furnizime të mbrojtjes ajrore përballë përdorimit në rritje të Rusisë të dronëve të prodhuar nga Irani.
Në fjalën për ambasadorët evropianë në një konferencë të mërkurën, Gantz tha: “Izraeli mbështet dhe qëndron përkrah Ukrainës, NATO-s dhe perëndimit. Duke u thënë këtë, unë do të doja të theksoja se Izraeli nuk do të dorëzojë sisteme armësh në Ukrainë për shkak të një sërë konsideratash operacionale. Ne do të vazhdojmë të mbështesim Ukrainën brenda kufizimeve tona, siç kemi bërë në të kaluarën”.
“Ne po ndjekim përfshirjen e Iranit në luftën në Ukrainë”, shtoi ai.
Izraeli ka ofruar ndihmë humanitare për Ukrainën që nga fillimi i pushtimit në muajin shkurt. Megjithatë, e kujdesshme ndaj nevojës për të ruajtur marrëdhëniet me Rusinë, e cila lehtëson operacionet izraelite kundër aktorëve të mbështetur nga Irani në Siri, ajo është përmbajtur nga dërgimi i materialit ushtarak.
Izraeli thuhet se tashmë ka filluar të ndajë inteligjencën bazë mbi programin e dronëve të Iranit me zyrtarët ukrainas. E përditshmja izraelite “Haaretz” raportoi të mërkurën se Izraeli do të ndihmojë Kievin në krijimin e një “sistemi të paralajmërimit të hershëm civil që shpëton jetë” për t’u mbrojtur nga sulmet ajrore.
Dmitry Medvedev, ish-president i Rusisë, akuzoi Tel Aviv-in se po përgatitet për të ofruar ndihmë ushtarake për Ukrainën në një mesazh Telegram të hënën./21Media