Katër pengje izraelite lirohen në një bastisje në qendër të Gazës

Katër pengje izraelite të rrëmbyer nga Hamasi nga festivali i muzikës Nova gjatë sulmeve të grupit të 7 tetorit janë shpëtuar, ka njoftuar ushtria izraelite.

Të shpëtuarit ishin Noah Argamani, 25 vjeç, Almog Meir Jan, 21 vjeç, Andrei Kozlov, 27 vjeç dhe Shlomi Ziv, 40 vjeç, thanë Forcat Mbrojtëse të Izraelit.

Ata u shpëtuan në një operacion të përbashkët “kompleks” gjatë ditës, të kryer me Agjencinë e Sigurisë së Izraelit dhe Policinë e Izraelit, nga dy vendndodhje të veçanta në Nuseirat, Gaza qendrore, tha IDF.

Ata janë në gjendje të mirë shëndetësore dhe janë transferuar në Qendrën Mjekësore “Sheba” Tel-HaShomer për ekzaminime të mëtejshme mjekësore, tha IDF.

Ministria e shëndetësisë e Gazës e drejtuar nga Hamasi thotë se dhjetëra njerëz, përfshirë fëmijë, janë vrarë dhe plagosur në operacion.

Stafi në spitalin Al-Aksa thuhet se po përpiqet të trajtojë viktimat.

“Dhjetëra të lënduar janë shtrirë në tokë dhe ekipet mjekësore po përpiqen t’i shpëtojnë me aftësitë e thjeshta mjekësore që kanë”, tha ministria në Facebook.

Shpëtimi i rrallë vjen tetë muaj pas luftës me Hamasin në Gaza.

Gjatë sulmit të grupit të 7 tetorit në festivalin e muzikës dhe zona të tjera të Izraelit jugor, militantët morën 251 pengje, 116 prej të cilëve tani mbeten në territorin palestinez, përfshirë 41 që ushtria thotë se janë të vdekur./21Media