“Kemi qenë dhe do t’jemi” – slogani i sivjetmë i Javës së Krenarisë në Kosovë

Organizatorët e Javës së Krenarisë në Kosovë kanë njoftuar përmes një komunikate për media se slogani i sivjetëm i javës është “Kemi qenë dhe do t’jemi”.

“Sllogani ‘Kemi qenë dhe do t`jemi’ është kaq i vogël për ta përshkruar ndjenjën tonë të krenarisë, për atë çka jemi e për atë ku do të arrijmë, ku do të lartohemi. Ekzistenca jonë është në paradën tonë të përditshme, në defileun tonë në një vend ku ngjyrat shpesh pengojnë. Duke e respektuar të kaluarën tonë, ne duam të shohim kah e ardhmja. Heshtja ka qenë mekanizmi ynë për shumë gjatë, por jo tash e tutje. Në mes të sfidave e vështirësive, shpirtrat tanë kanë mbetur të fuqizuar”, thuhet në një komunikatë të organizatave që organizojnë javën e cila shërben si demonstrim për barazi te komunitetet LGBTIQ+.

Tutje është bërë e ditur se kjo javë do të nisë më 3 qershor, ndërsa janë paralajmëruar disa aktivitete për javën e ardhshme.

Parada e Krenarisë 2024 do të mbahet më 8 qershor. Ky është edicioni i tetë i Javës së Krenarisë në Kosovë.

“Për neve, ta organizojmë Javën e Krenarisë në Kosovë nuk nënkupton vetëm festë: Java e Krenarisë, qysh prej edicionit historik të parë, i vë në hartë të gjithë ata individë që avokojnë çdo ditë për barazi, për gjithëpërfshirje, për të frymuar e për të qenë vetja në një vend ku të marrësh frymë nuk është e lehtë për asnjë”, thuhet në njoftimin e organizatorëve.