Kina paralajmëron SHBA-në të mos e kalojë “vijën e kuqe”

Ministri i Jashtëm kinez, Wang Yi, ka thënë se Shtetet e Bashkuara duhet ta ndalojnë “rutinën e vjetër të ngacmimit të njëanshëm”, në një telefonatë me Sekretarin e Shtetit amerikan, Antony Blinken.
Wang akuzoi SHBA-në për përpjekje për të shtypur zhvillimin e Kinës.
“Uashingtoni duhet t’i kushtojë vëmendje shqetësimeve legjitime të Pekinit”, tha ai, duke paralajmëruar SHBA-në kundër përpjekjeve për të sfiduar linjat e kuqe të Kinës duke përdorur taktikat e “prerjes së sallamit”.
Ai i referohej praktikës së përdorimit të një sërë veprimesh të vogla për të arritur një rezultat shumë më të madh që do të ishte e vështirë të realizohej me një veprim të vetëm të madh.
Vërejtjet e Wang nënvizuan tensionet e thella që shënojnë marrëdhëniet mes dy ekonomive më të mëdha në botë, edhe pse liderët e tyre janë përpjekur të ri-angazhohen në diplomaci javët e fundit.
Presidenti kinez, Xi Jinping, u takua me presidentin e SHBA-së Joe Biden, muajin e kaluar, ku ata diskutuan një sërë çështjesh të nxehta, duke përfshirë Tajvanin.
Biden kishte ngritur kundërshtime ndaj “veprimeve shtrënguese dhe gjithnjë e më agresive të Kinës ndaj Tajvanit”, të cilat ai tha se minuan paqen dhe stabilitetin në ngushticën e Tajvanit dhe në rajonin më të gjerë dhe rrezikuan prosperitetin global.
Xi e quajti atë “vijën e parë të kuqe” që nuk duhet të kalohet në marrëdhëniet Kinë-SHBA./21Media