Konjufca: Kosova s’ka çka kërkon në dialog nëse për Asociacionin s’respektohet kushtetuta

(Lajm i përditësuar)

Kryetari i Kuvendit të Kosovës, Glauk Konjufca, ka deklaruar se statuti i Asociacionit duhet të jetë brenda kornizës së Kushtetutës së Kosovës.

Madje, ai ka nënvizuar se nëse bashkësia ndërkombëtare si pikënisje të Asociacionit nuk e sheh Kushtetutën e Kosovës, atëherë Kosova s’ka çka kërkon në dialog.

Pas takimit me homologun e tij austriak, Konjufca në konferencë për medie, tha se Serbia po e shkel marrëveshjen të arritur në Bruksel dhe Ohër, derisa edhe po kërkon edhe republikë serbe në Kosovë.

Në anën tjetër, kryetari i Parlamentit të Austrisë, Wolfgang Sobotka, shprehu mbështetjen për rrugën evropiane të Kosovës.

Duke folur për dialogun Kosovë-Serbi, ai tha se marrëveshja e Ohrit është shumë e rëndësishme dhe se dy palët duhet ta zbatojnë atë.

Si zgjidhje, ai përmendi edhe Tirolin Jugor, ku mund të arrihet një zgjidhje kompromisi.

“Tiroli i Jugut ka treguar se si përmes rrugës së dialogut mund të arrijmë një rezultat të mirë. Kjo mund të vlejë edhe për komunat me shumicë serbe në Kosovë”.

​Konjufca pret në takim homologun e tij nga Austria

Kryetari i Kuvendit të Kosovës, Glauk Konjufca, ka pritur në takim homologun e tij nga Austria, Wolfgang Sobotka.

Pas takimit, dy kryeparlamentarët do të mbajnë konferencë për media.

Gjithashtu, Konjufca dhe Sobotka do të marrin pjesë edhe në “Punëtorinë për Demokraci – DEMOS-ti” dhe do të bashkëbisedojnë me nxënës filloristë, në hollin e Kuvendit të Kosovës.

Sobotka gjatë vizitës së tij në Kosovë, do të takojë edhe kryeministrin e vendit, Albin Kurti.