Kriza në Ukrainë: Më fund foli Putini…

Presidenti rus Vladimir Putin ka akuzuar Shtetet e Bashkuara se po përpiqen ta tërheqin vendin e tij në luftën në Ukrainë.
Në komentet e tij të para të rëndësishme për krizën në pak javë, ai tha se qëllimi i Amerikës ishte të përdorte konfrontimin si një justifikim për të vendosur sanksione shtesë ndaj Rusisë.
Ai tha gjithashtu se Shtetet e Bashkuara injorojnë shqetësimet e Rusisë për forcat e NATO-s në Evropë.
Tensionet janë të larta për shkak të akumulimit të trupave ruse pranë kufijve të Ukrainës.
Në javët e fundit, Rusia ka transferuar rreth 100.000 trupa – të pajisura me gjithçka, nga tanket dhe artileria te municionet dhe forcat ajrore – në kufirin e Ukrainës.
Por Rusia mohon akuzat nga perëndimi se po planifikon një pushtim, pothuajse tetë vjet pasi aneksoi gadishullin jugor të Krimesë të Ukrainës dhe mbështeti një kryengritje të përgjakshme në rajonin lindor të Donbasit.
Moska, nga ana tjetër, akuzon qeverinë ukrainase për dështimin në zbatimin e një marrëveshjeje ndërkombëtare për rivendosjen e paqes në lindje, ku të paktën 14,000 njerëz u vranë dhe rebelët e mbështetur nga Rusia kontrollojnë pjesë të territorit.
Civilët ukrainas po përgatiten për luftë
Duke folur pas bisedimeve me kryeministrin hungarez Viktor Orban në Moskë, Putin tha: “Më duket se Shtetet e Bashkuara nuk janë aq të shqetësuara për sigurinë e Ukrainës… por detyra e tyre kryesore është të frenojnë zhvillimin e Rusisë, kurse vetë Ukraina është vetëm një mjet për të arritur këtë qëllim”.
Rivaliteti midis Rusisë dhe Shteteve të Bashkuara, të cilat ende kanë arsenalet më të mëdha bërthamore në botë, daton që nga Lufta e Ftohtë (1947-89). Ukraina ishte atëherë një pjesë kyçe e Bashkimit Sovjetik komunist, menjëherë pas Rusisë.
Putin tha se Shtetet e Bashkuara i kishin injoruar shqetësimet e Moskës në përgjigjen e saj ndaj kërkesave të Rusisë për garanci ligjore detyruese të sigurisë, duke përfshirë një bllokadë të zgjerimit të mëtejshëm të NATO-s në lindje.
Ai sugjeroi se nëse Ukraina do të anëtarësohej në NATO, ajo mund të tërhiqte anëtarët e tjerë në luftë me Rusinë.
“Imagjinoni që Ukraina është një anëtare e NATO-s dhe një operacion ushtarak (për të rifituar Krimenë) fillon,” tha udhëheqësi rus. “Çfarë – do të luftojmë me NATO-n? A ka menduar dikush për këtë? Duket sikur nuk e kanë menduar”, thuhet ndër të tjera në nje shkrim më të gjatë të CNN./E.D-21Media