Kthesë e madhe e motit në Kosovë, temperaturat ngjiten deri në 38°C

Java e ardhshme në Kosovë do të nisë me mot më të paqëndrueshëm, ndërsa nga dita e enjte temperaturat do të rriten ndjeshëm. Sipas Institutit Hidrometeorologjik të Kosovës (IHMK), të premten temperaturat maksimale do të arrijnë deri në 38 gradë Celsius.

Të hënën pritet mot me diell dhe vranësira lokale, të cilat mund të sjellin reshje shiu, shkarkime rrufesh dhe në disa zona edhe breshër.

Temperaturat minimale do të lëvizin nga 13 deri në 15 gradë Celsius, ndërsa maksimalet nga 26 deri në 30 gradë.

Të martën moti do të jetë me diell dhe vranësira të shpërndara, ndërsa të mërkurën pritet mot kryesisht i kthjellët dhe stabil, me rritje të temperaturave. Maksimalet do të arrijnë deri në 33 gradë Celsius.

Të enjten dhe të premten do të vazhdojë rritja e temperaturave. Të enjten pritet të arrijnë deri në 36 gradë Celsius, ndërsa të premten deri në 38 gradë Celsius, duke shënuar ditën më të nxehtë të javës.

“Gjatë ditëve të para të periudhës, kushtet biometeorologjike do të jenë kryesisht të mira, me mundësi për shqetësime të përkohshme gjatë reshjeve dhe ndryshimeve të shpejta atmosferike. Nga e enjtja dhe e premtja, për shkak të temperaturave të larta, pritet ngarkesë më e shtuar termike, veçanërisht në orët e mesditës dhe pasdites. Rekomandohet shmangia e ekspozimit të gjatë në diell dhe konsumimi i mjaftueshëm i lëngjeve. Indeksi UV pritet të jetë i lartë deri shumë i lartë gjatë ditëve me kthjellime. Rekomandohet mbrojtje nga rrezatimi diellor, përdorimi i kremrave mbrojtës dhe shmangia e ekspozimit nga ora 11:00–16:00”, ka njoftuar IHMK.

“Reshjet e mundshme në fillim të periudhës do të jenë të dobishme për kulturat bujqësore, por mund të jenë të shoqëruara me rrezik lokal nga breshëri dhe erërat e forta. Rritja e temperaturave nga mesi i javës do të rrisë kërkesën për ujë te kulturat bujqësore, veçanërisht te misri, perimet dhe pemishtet. Rekomandohet ujitje gjatë orëve të freskëta të ditës, kryesisht herët në mëngjes”.