Kurti ia kthen letrën Thaçit për takim

Kreu i Vetëvendosjes ka refuzuar ftesën

Lëvizja Vetëvendosje ka bërë të ditur se kreu i kësaj partie Albin Kurti ia ka kthyer përgjigjen presidentit të Kosovës, Hashim Thaçit, lidhur me takimin e radhës.

Presidenti Thaçi kishte kërkuar përmes një letre takim me kreun e VV-së për nesër në ora 10:00, në kabinetin e tij.

“Me qëllim të funksionalizimit sa më të shpejtë të institucioneve të Republikës së Kosovës, si president i Republikës së Kosovës do t’i ndërmarrë të gjitha hapat e përcaktuar në Kushtetutë”, thuhet në ftesën e Thaçit.

Presidenti kërkoi që në këtë takim konsultativ t’i konfirmohet i propozuari për kryeministër për formimin e qeverisë së Kosovës.

Por, kreu i Vetëvendosjes ka refuzuar ftesën, duke propozuar që takimi të mbahet të hënën, më 6 janar, në një orë të përshtatshme.