Kurti: Kosova vend i mundësive për të rinjtë, për komunitetet joshumicë, për të gjithë

Kryeministri i Kosovës, Albin Kurti, mori pjesë dhe ishte folës kryesor në ngjarjen e organizuar nga Ministria e Financave, Punës dhe Trasnfereve me përfitues nga komunitetet joshumicë të programit “Kosova Generation Unlimited”, praktikë me pagesë.

Duke uruar dhe falënderuar ekipin e Ministrisë së Financave, Punës dhe Transfereve, UNICEF-in, si dhe të gjitha bizneset që janë anëtare të rrjetit CSR për lansimin e kësaj nisme, kryeministri Kurti tha se jemi më afër përmbushjes së zotimit tonë.

Kryeministri Kurti tha se ne e dimë se ka një numër të madh të të rinjve, që përveç se nuk janë në punë, nuk janë as në shkollë e as në fakultet, e as në ndonjë trajnim. “30% e të rinjve të moshës prej 15 deri në 24 vjeç janë në një gjendje të tillë. Kurse, në disa nga komunitetet joshumicë në Kosovë, përqindja e të rinjve pa punë, arsim apo trajnim është edhe më e lartë sesa kaq”.

“Qeveria ka krijuar Ekipin Ndërinstitucional për Promovimin e Punësimit të Romëve, Ashkalinjve dhe Egjiptianëve, dhe ka alokuar buxhet për bursa, për 500 studentë në shkolla të mesme si dhe në universitetet publike. Gjithashtu, javën që lamë pas Qeveria ka njoftuar qytetarët për një pako të re mbështetëse prej 3 milionë eurove, përfitues të të cilit do të jenë të gjitha komunitetet joshumicë në Kosovë. Kjo pako do të fokusohet në krijimin e vendeve të reja të punës në biznese ekzistuese, por edhe në ato të reja, si dhe për bujqit dhe prodhuesit e vegjël në vendet rurale”, thuhet në komunikatën nga zyra e kryeministrit.

Tutje në komunikatë thuhet se duke potencuar faktin se nga lansimi i përbashkët i programit K-GenU kemi mbi 600 të rinj përfitues dhe 500 biznese të regjistruara, kryeministri Kurti tha se këtë gatishmëri mund ta shohim sot në këtë sallë nga praktikantët prej komuniteteve joshumicë, nga kompanitë e mediave, të fotografisë, dizajnit grafik, të biznesit për prodhimin e frutave ‘goji’ dhe klinike private, si dhe nga OJQ-të për aktivitete kulturore, të avokimit dhe të vullnetarizmit për të rinjtë.

Në komunikatë bëhet e ditur se në platformën Superpuna, e cila ofron mundësi punësimi për të rinjtë e moshës prej 18 deri 25 vjeç, për vetëm 2 muaj, janë mbi 4.700 pozita të lira pune, mbi 6.400 punëkërkues të verifikuar, mbi 3.700 biznese të regjistruara, e mbi 2.000 marrëdhënie pune. Kryeministri Kurti tha se duhet t’iu tregojmë të gjithë të rinjve për këto mundësi, në mënyrë që të kemi sa më shumë të regjistruar në të dy këto platforma, e veçanërisht në K-GenU, që gjithashtu ata të bëhen pjesë e punës praktike me pagesë./21Media