Kurti njofton se nga 9 maji serbët mund t’i ndërrojnë patentë shoferët ilegalë në RKS

Ministria e Punëve të Brendshme ka nxjerrë një vendimin që mundëson kalimin nga patent shoferi i lëshuar nga institucionet jolegale serbe në Kosovë, në ato zyrtare, të lëshuara nga institucionet e Republikës së Kosovës, ka njoftuar kryeministri i Kosovës, Albin Kurti.

“Kalimi në patent shoferë të RKS, mundëson regjistrimin e lehtë dhe praktik të automjeteve. Nuk kërkon përsëritje të dhënies së provimit për fitim të patent shoferit por vetëm aplikim të cilin, çdo qytetar duhet ta dorëzojë në Qendrën për Pajisje me dokumente, përfshirë:
-letërnjoftimin,
-origjinalin e patent shoferit të lëshuar nga ana e autoriteteve serbe,
-çertifikatën e gjendjes shëndetësore për pajisje me patent shofer,
-dëshmi të pagesës së taksës, dhe
-origjinalin e patent shoferit të lëshuar nga UNMIK apo RKS në qoftë se bëhet aplikimi për shtimin e kategorive, gjë e cila po ashtu është mundësuar përmes këtij vendimi të Ministrisë së Punëve të Brendshme.”, ka thënë Kurti,.

Ai ka njoftuar se vendimi hyn në fuqi me datën 9 maj dhe është valid deri me datën 9 gusht 2024.

“Ju bëjmë thirrje që në afat sa më të shkurtër të aplikoni për të realizuar të drejtën tuaj.”, ka përfunduar kreu i ekzekutivit./21Media