Kurti pranoi Raportin e Progresit nga Ambasadori Szunyog

2 min read

Kryeministri i Kosovës, Albin Kurti ka pranuar sot Raportin e Komisionit Evropian i njohur si Raporti i Progresit, të cilin ia ka dorëzuar Shefi i Zyrës së BE-së në Kosovë, njëherësh Përfaqësues Special i BE-së, ambasadori Tomáš Szunyog.

Sipas Kurtit rruga drejt integrimit në Bashkimin Evropian kërkon reforma e arritje të mëdha, por në këta muaj qeverisës  ka dëshmuar se janë në rrugën dhe drejtimin e duhur, Kurti tutje ka theksuar se në këtë rrugëtim do të ecin së bashku në partneritet dhe me mbështetjen e plotë të Bashkimit Evropian.

”Në frymën e përkushtimit të fuqishëm të Kosovës ndaj rrugës së saj drejt BE-së, përmes Marrëveshjes së Stabilizim-Asociimit dhe Agjendës për Reforma Evropiane si korniza kryesore themelore, qeveria  e re ka demonstruar një dinamikë të re të reformave përgjatë gjashtë muajve nga formimi i saj. Kjo dinamikë mund të shihet në reformat të cilat janë indikacion i një baze të fortë të potencialit të Kosovës në zhvillimin e shpejt të saj në rrugën drejt Bashkimit Evropian”, ka thënë Kurti.

Në rrjedhën e sqarimit të ambasadorit Szunyog rreth raportit një vjeçar, nga tetori 2020 deri në tetor 2021, kryeministri vuri theksin në pjesën e dytë të tij, në progresin e shënuar në gjashtë muajt e qeverisë së re.

”Në këta gjashtë muaj të qeverisë kemi stabilitet institucional, legjitimitet demokratik dhe besueshmëri të lartë në institucione nga ana e qytetarëve që përbënë progres të madh shoqëror. Kryeministri potencoi progresin dhe rezultatet konkrete në fushën e sundimit të ligjit, luftimit të krimit të organizuar dhe korrupsionit, administratës publike, zhvillimit ekonomik, punësimit dhe kujdesit social”, theksohet në komunikatë.

Tutje Kurti veçoi progresin e pamohueshëm në fushën e vaksinimit dhe menaxhimit të pandemisë, duke njoftuar se dje kishim vetëm një rast të ri me COVID-19 dhe asnjë vdekje. Po ashtu dje numri i të vaksinuarve ka mbërritur shifrën e 1.5 milion dozave të administruara, dhe se Kosova mbetet vendi i parë në rajon sa i përket vaksinimit të popullatës.

Duke biseduar për zgjedhjet komunale ku subjektet politike dhe kandidatët garuan me platformat e tyre, në takim u vlerësua se Kosova dëshmoi organizim dhe administrim të mirë, me transparencë të plotë dhe garë demokratike.

Pas takimit, u mbajt konferencë e përbashkët për shtyp e Kryeministrit të Republikës së Kosovës, Albin Kurti dhe Shefit të Zyrës së BE.