Kurti viziton policin që u plagos mbrëmë në veri

Kryeministri i Kosovës, Albin Kurti ka vizituar në QKUK, policin e plagosur, Ekrem Neziri.
“Ekrem Neziri, polici që u plagos mbrëmë në veri të Kosovës, është operuar me sukses të plotë sot në QKUK. Vullnetin e kishte të fortë, kurse shëndetin e mirë. Me të këtillë zyrtarë mbahet shteti. Kriminelët do të ndiqen e dënohen”, ka shkruar Kurti.
Polici Ekrem Neziri që u plagos mbrëmë në veri është në gjendje shëndetësore stabile. Nga Qendra Klinike Universitare e Kosovës thanë se operimi i tij ka kaluar me sukses dhe për disa ditë do të trajtohet në spital.
Mjeku kujdestar në Qendrën Emergjente të QKUK, Avdush Bajgora, tha para mediave se pacienti është pranuar rreth orës 08:30 dhe në pranim është monitoruar ndërsa parametrat vitale kanë qenë të gjitha stabile.
“Kemi bërë edhe ekzaminime tjera si CT e kokës ku është konstatuar se tek pacienti kemi pjesë të metalit në këtë rast të predhës në regjionin e kraharorit. Në bazë të analizave biokimike dhe biohemetologjike është konstatuar se pacienti ka gjendje stabile dhe është dërguar për trajtim në Kirurgjinë Turakale ku edhe i është bërë intervenimi”, tha Bajgora.
Ndërsa mjeku që e operoi tha se trajtimi i policit do të vazhdojë edhe për disa ditë në spital./21Media