Kusari-Lila i reagon opozitës: Koha e mospjesëmarrjes në votim mbaroi

Mimoza Kusari-Lila, deputete e Lëvizjes Vetëvendosje, ka thënë se Gjykata Kushtetuese me vendimin e së enjtes për çështjen e seancës konstituive e ka bërë të qartë se votimi në të është obligim kushtetues, e këtu, sipas saj, përfshihet edhe votimi për komisionin zgjedhor për votim të fshehtë.

Me këtë rast, ajo u ka thënë deputetëve të partive që deri tash ishin në opozitë se ka mbaruar koha e mospjesëmarrjes në votim.

“Interpretimet e partive opozitare se gjoja është hedhur poshtë votimi i fshehtë nga Gjykata Kushtetuese — edhe sikur të ishin të sakta (e nuk janë) — nuk e justifikojnë mungesën në votimin e hapur për Komisionin zgjedhor. Ai votim është i hapur dhe, sipas vendimit të Gjykatës, pjesëmarrja në votim është obligim kushtetues. Andaj, të nderuar deputetë: mos vazhdoni me shkelje të Kushtetutës, por merrni pjesë në votim. Nesër, në ora 11:00, ne do të jemi aty — të gatshëm për votim dhe përmbyllje të seancës konstituive. Koha e mosjesëmarrjes në votim mbaroi — tani është koha për votim dhe përgjegjësi serioze ndaj Republikës dhe Kushtetutës”, ka shkruar ajo në Facebook.