Lansohet programi “Sport në Shkolla”, synohet ndërtimi i një shoqërie aktive
(Lajm i përditësuar)
Lansohet programi “Sport në Shkolla”, synohet ndërtimi i një shoqërie aktive
Federata e Sportit Shkollor të Kosovës, në bashkëpunim me Ministrinë e Kulturës, Rinisë dhe Sportit dhe me Ministrinë e Arsimit, Shkencës, Teknologjisë dhe Inovacionit, ka lansuar sot Programin Nacional “Sport në Shkolla”, program ky që ka për qëllim shtimin e numrit të aktiviteteve sportive nëpër të gjitha shkollat fillore dhe të mesme të Kosovës si dhe përmirësimin e infrastrukturës sportive në vend.
Me këtë rast, kryeministri i Republikës së Kosovës, Albin Kurti, tha se ky program synon ndërtimin e një shoqërie aktive dhe të shëndetshme si dhe mirëqenien e të rinjve.
“Jemi mbledhur këtu së bashku për të shënuar fillimin e programit ‘Sport në Shkolla’, nismë kjo e cila synon fuqizimin e nxënësve dhe të rinjve tanë përmes ndërlidhjes së arsimit me sportin dhe të sportit me shëndetin. Ministria e Kulturës, Rinisë dhe Sportit në bashkëpunim me Ministrinë e Arsimit dhe federatat sportive kanë hartuar programin ‘Sport në Shkolla’ i cili ka për qëllim ndërtimin e një shoqërie aktive dhe të shëndetshme nëpërmjet pjesëmarrjes së rregullt me aktivitete fizik dhe sportiv. Mirëqenia e të rinjve është kryefjala e këtij programi”, ka thënë Kurti.
I pari i Qeverisë së Kosovës shtoi se programi në vete përfshinë pesë komponentë.
“Programi është hartuar në kornizë kohore prej gjashte vitesh dhe i përfshinë pesë kompenentë. Zhvillimi i aktivitetit të rregullt sportiv dhe fizik në shkollë, organizimin e garave sportive në shkolla, ngritjen e kapaciteteve të mësimdhënësve për organizimin e aktivitetit sportiv, furnizimin e shkollave me pajisje sportive dhe përmirësimin e infrastrukturës sportive shkollore”, theksoi Kurti.
E komuna ku u lansua ky projekt ishte ajo e Poidujevës.
Kryetari i saj, Shpëtim Bulliqi, tha se ky program gjithashtu i ndihmon nxënësit të zhvillojnë aftësitë e tyre sociale.
“Aspekti fizik dhe vitaliteti i nxënësve është tejet i rëndësishëm për shëndetin fizik dhe psiqik të tyre. Aktivitete sportive jo vetëm që i ndihmojnë ata që ta ruajnë një trup të shëndetshëm, por gjithashtu i ndihmon nxënësit të zhvillojnë aftësitë e tyre sociale. Angazhimi i të rinjve në sport është i rëndësishëm për të ardhmen e tyre”, tha Bulliqi.
Pas përfundimit të ceremonisë për lansimin e këtij projekti në shkolla, kryeministri Kurti zhvilloi një takim me kryetarin Bulliqi, në objektin e komunës.
Sot lansohet Programi Nacional “Sport në Shkolla”
Federata e Sportit Shkollor të Republikës së Kosovës në bashkëpunim me Ministrinë e Kulturës, Rinisë dhe Sportit dhe me Ministrinë e Arsimit, Shkencës, Teknologjisë dhe Inovacionit do të lansojnë sot Programin “Sport në Shkolla”.
Këtë e ka bërë të ditur Federata e Sportit Shkollor të Republikës së Kosovës, shkruan rtv21.tv.
“Programi “Sporti në Shkolla” është një iniciativë shtetërore që sjell së bashku edukimin, sportin dhe shëndetin për të ndërtuar një brez të ri, aktiv dhe të shëndetshëm në Republikën e Kosovës”, thuhet në njoftimin e Federatës në Facebook.
Pjesë e këtij programi është edhe Federata e Basketbollit e Kosovës dhe Federata e Shahut e Kosovës./21Media