Luftëtarët e Wagner pësuan “humbje të konsiderueshme”

Njësitë sulmuese Wagner po pësojnë “humbje të konsiderueshme” ndërsa përparojnë nga disa drejtime rreth qytetit lindor të rrethuar të Bakhmutit, tha të hënën një komandant i lartë ushtarak ukrainas.

Duke folur në kanalin Telegram të Qendrës Ushtarake Mediatike të Ukrainës, gjeneral-koloneli Oleksandr Syrskyi tha se sulmet nga grupi mercenar rus ishin zmbrapsur deri më tani.

“Situata rreth Bakhmutit mbetet e vështirë. Njësitë sulmuese të Wagner po përparojnë nga disa drejtime, duke u përpjekur të thyejnë mbrojtjen e trupave tona dhe të avancojnë në rrethet qendrore të qytetit, “tha Syrskyi.

“Gjatë betejave të ashpra, mbrojtësit tanë i shkaktojnë armikut humbje të konsiderueshme. Të gjitha përpjekjet e armikut për të pushtuar qytetin zmbrapsen nga artileria, tanket dhe fuqitë e tjera të zjarrit”.

Shefi i Wagner-it, Yevgeny Prigozhin, ka pranuar se forcat ukrainase po luftojnë ashpër për qytetin, të cilin Ukraina është zotuar ta mbrojë pasi javë të tëra sulmesh ruse e lanë atë në prag të rënies në duart e trupave të Moskës.

Në një mesazh audio të postuar në faqen e tij në Telegram të dielën, Prigozhin tha “Situata në Bakhmut është shumë e vështirë, armiku po lufton për çdo metër. Sa më afër qendrës së qytetit, aq më të vështira janë betejat, aq më shumë artileri punon kundër nesh dhe aq më shumë tanke.”/21Media