Mane fitoi çmimin “Lojtari Afrikan i Vitit”

Sulmuesi i Bayern Munichut, Sadio Mane u kurorëzuapër herë të dytë “Lojtari Afrikan i Vitit”, me ç’rast sot e pranoi çmimin prestigjioz.
Mane, i cili iu bashkua Bayernit në fillim të kësaj vere, në garën për ta fituar çmimin në fjalë mposhti ish-bashkëlojtarin e Liverpoolit, Mohamed Salah dhe portierin e Chelseat, Edouard Mendy.
Mane shënoi 23 gola për Liverpoolin në sezonin e kaluar për t’i ndihmuar ata të fitojnë FA Cup dhe Carabao Cup. “Të Kuqtë” arritën gjithashtu në finalen e Ligës së Kampionëve ku u mposhtën 1:0 nga Real Madridi, ndërsa përfunduan vetëm një pikë prapa kampionit Manchester City në garën për titullin e Premier Ligës.
Në nivel ndërkombëtar, Mane frymëzoi Senegalin drejt triumfit në Kupën e Kombeve të Afrikës në muajin shkurt. Ai shënoi golin e fitores kur Senegali mposhti Egjiptin e Salah me penallti në finale.
Mane shënoi tri gola gjatë turneut, një më shumë se Salah.
Çmimi “Futbollisti Afrikan i Vitit” është dhënë nga Konfederata e Futbollit Afrikan (CAF) që nga viti 1992, ku ndër lojtarët të cilët e kanë fituar atë janë: Mohamed Salah, Riyad Mahrez, Pierre-Emerick Aubameyang, Yaya Toure, Samuel Eto’o, Didier Drogba dhe George Weah.