Mbi 3 milionë e 500 mijë euro vlera e dëmeve nga vërshimet në Rahovec
3 milionë e 546 mijë e 477.66 është vlera e dëmeve të shkaktuara sivjet nga përmbytjet dhe vërshimet në komunën e Rahovecit. Kështu ka bërë të ditur sot kryetari i kësaj komune, Smajl Latifi, cili ka publikuar raportet e komisioneve për vlerësimin e dëmeve në komunën e Rahovecit.
“Si pasojë e të reshurave të mëdha të shiut, më 17 shtator të këtij viti, komuna e Rahovecit është goditur në masë të madhe nga përmbytjet si në: shtëpi banimi, ekonomi familjare, biznese, hapësira dhe objekte publike, bujqësi etj. Me vendimin tim janë formuar edhe komisione të veçanta të regjistrimit dhe vlerësimit të dëmeve si në: amvisëri, ekonomi të shumta familjare e biznese, bujqësi dhe infrastrukturë publike. I falënderoj anëtarët e secilit komision të cilët kanë bërë një punë të mirë në terren, ku edhe pse ishin në grevë, u përkushtuan ta kryejnë punën e vet me përgjegjësi dhe profesionalizëm. Në raportet e përgatitura nga komisionet për vlerësimin e dëmeve në bujqësi, ekonomi familjare dhe biznese, amvisëri e infrastrukturë publike, është paraqitur vlera e dëmit total është: 3, 546,477.66 €.”, ka shkruar Latifi.
Ai ka treguar se kanë bërë kërkesat në Qeverinë e Kosovës për kompensimin të dëmeve, sepse siç ka potencuar ai, një barrë e tillë financiare është shumë e rëndë dhe e papërballueshme për buxhetin e komunës.
“Kërkesat janë parashtruar për Kryeministrin e Qeverisë së Republikës së Kosovës, z.Albin Kurti dhe ministritë gjegjëse: MBPZHR, MAPL, MMPHI, MINT, ku edhe kemi kërkuar që të ndahet buxhet për t’i kompenzuar qytetarët e dëmtuar të komunës sonë.”, ka shkruar ai.
Latifi ka shprehur shqetësimin për situatën e krijuar si pasojë e përmbytjeve dhe vërshimeve dhe njëkohësisht ka kërkuar përkrahje nga Qeveria për ta tejkaluar më lehtë gjendjen momentale, duke insistuar në kompenzimin e dëmeve të mëdha – tashmë të ditura, pas vlerësimit nga ana e komisioneve./21Media
Dëshiron ta dëgjosh këtë lajm me zë?