Murati reagon pasi komunat dërguan në Kushtetuese Ligjin për Tatimin në Pronë
(Lajm i përditësuar)
Murati reagon pasi komunat dërguan në Kushtetuese Ligjin për Tatimin në Pronë
Ministri i Financave, Hekuran Murati ka reaguar pasi komunat dërguan në Gjykatën Kushtetuese Ligjin për tatimin në pronë.
Ai ka thënë se opozita në Kosovë se nuk e ka hallin e qytetarit e as të shtetit.
“Për ligjin që e kishin miratuar vetë më 2018, ligj i cili parashihte vlerësimin e pronave sipas tregut, dhe që parashihte që përveç tatimit në objekte, të fillonte edhe të llogaritej tatimi në tokë me 100% të vlerës në vitin 2023, tentuan t’ia hedhin fajin qeverisë sonë. Thanë se qytetarit po i vihej barrë e papërballueshme, dhe se po të ishte në dorën e tyre, do ta lehtësonin këtë barrë. Qeveria Kurti e bëri këtë të mundur duke miratuar ndryshimin e Ligjit për Tatim në Pronë, ashtu që secila komunë të kishte mundësinë të falte faturat deri në 100 euro për vitin 2023, për të gjithë tatimpaguesit. Dhe, çfarë bëjnë tash ata që para 6 muajsh ‘qanin hallin e qytetarëve’? E dërgojnë ligjin në Gjykatë Kushtetuese. Pra, po dëshmohet edhe njëherë që britmat këta nuk i kanë as për qytetarin e as për shtetin”, ka shkruar Murati në Facebook.
Ai e ka quajtur të kotë veprimin e opozitës dhe ka përsëitur tashmë është në fuqi dhe se data 15 shtator 2023 është e fundit që komunat të vendosin për faljen ose jo të një pjese të tatimit në pronë për të gjithë tatimpaguesit.
“Krejt çka po duan të bëjnë me këtë potez kasta e vjetër politike, është që të fshihen prapa Gjykatës Kushtetuese, se gjoja ata ‘do ta kishin miratuar zbritjen e tatimit, por ja që ligji është bllokuar në Gjykatë Kushtetuese’. Por kjo nuk pin ujë”, ka shtuar ministri.
Komunat e dërgojnë në Gjykatën Kushtetuese Ligjin për Tatimin në Pronë
Asociacioni i Komunave të Kosovës (AKK), e ka dërguar në Gjykatën Kushtetuese Ligjin për Tatimin në Pronë.
Kërkesa është dorëzuar nga drejtori i AKK-së, Sazan Ibrahimi dhe kryetari i Prizrenit, Shaqir Totaj.
AAK thotë se Ministria e Financave nuk i ka konsultuar fare kur mori vendim për ndryshimin e këtij Ligji.