Një orë grevë në shkollat e Kosovës
Nëse nuk plotësohen kërkesat, SBASHK paralajmëron grevë tjetër
Sindikata e Bashkuar e Arsimit, Shkencës dhe Kulturës së Kosovë- SBASHK ka shpallur grevë njëorëshe për sot në shkollat e Kosovës, për shkak të paralajmërimit se mund të votohet projektligji për pagat së bashku me Projektligjin e Buxhetit 2019.
Drejtuesit e kësaj sindikate kanë thënë se me këtë projektligj janë të injoruar krahasuar me sektorë të tjerë.
Kryetari i SBASHK-ut, Rrahman Jashari ka thënë se me projektligjin për paga koeficienti për arsim duhet të jetë 2.6.
Ai ka thënë se greva njëorëshe në çerdhe do të jetë prej orës 07:00 deri në orën 08:00.
Në të gjitha shkollat e Kosovës greva nis në orën e parë të të gjitha ndërrimeve, kurse në Universitetin e Prishtinës greva do të mbahet prej orës 08:00 deri në orën 09:00.
Nëse nuk plotësohen kërkesat edhe pas kësaj greve njëorëshe, SBASHK paralajmëron grevë tjetër më 14 janar në të gjitha shkollat e Kosovës.
Dëshiron ta dëgjosh këtë lajm me zë?