Nxënësit sot pushim, për nder të Ditës së Çlirimit

Nxënësit e shkollave fillore dhe atyre të mesme edhe sot pushojnë, kësaj here për nder të Ditës së Çlirimit e cila ishte dje të dielën e 12 qershorit.

Dje u shënua përvjetori i 23-të i çlirimit të Kosovës nga pushtuesit serb.

Më 12 qershor 1999, pas 78 ditë bombardimesh të Aleancës Ushtarake Perëndimore të udhëhequr nga Amerika kundër caqeve ushtarake serbo-malazeze në Kosovë në Serbi dhe Mal të Zi, trupat e NATO-s hynë në Kosovë në misionin paqeruajtës KFOR, duke i dhënë fund luftës gati dyvjeçare midis popullsisë kryengritëse shqiptare të organizuar në radhët e Ushtrisë Çlirimtare të Kosovës dhe forcave okupuese ushtarake dhe policore serbo-malazeze.

E vlerësuar nga ata që e përjetuan si ditë e çlirimit dhe si një ndër ditët më të mëdha të historisë së Kosovës, 12 qershori, ndonëse jo e njohur edhe si festë zyrtare, është një ditë kur nga ushtarakë dhe diplomatë botërorë do të mbahet mend si një ditë gati konfrontimi midis Perëndimit dhe Rusisë, një ditë siç thuhej, ‘që do të mund të niste Luftën e Tretë Botërore.’

Ndërkohë, disa nxënës do ta kenë pushim edhe nesër, në shkollat që janë qendra testimi për Testin e Arritshmërisë./21Media

Artikuj të ngjashëm

Back to top button
close button