OAK kërkon nga kryeministri Rama përkrahje për vaksinimin e punëtorëve

 
Oda e Afarizmit të Kosovës (OAK) i është drejtuar me një shkresë kryeministrit të Shqipërisë, Edi Rama, ku ka kërkuar ta përkrah Republikën e Kosovës në furnizimin me vaksina, në mënyrë që edhe vendi jonë sa më parë të fillojë me vaksinimin e të punësuarve të sektorit privat dhe mos ketë pengesa në lëvizjen e të punësuarve të tyre për çështjet biznesore.
Sipas OAK, një kërkesë e tillë vije pasi që Bashkimi Evropian shumë shpejt pritet të kushtëzojë lëvizjen e qytetarëve në bazë të vaksinimit.
“OAK vlerëson se një gjë e tillë do të paraqes pengesa dhe vështirësi të jashtëzakonshme në lëvizjen e stafit të sektorit privat për udhëtime jashtë vendit, qoftë për furnizim me lëndë të parë, produkte apo gjysmëprodukte ashtu edhe për marrëveshjet dhe vazhdimin e kontratave të tyre ndërkombëtare. Po ashtu, vaksinimi i kësaj kategorie duhet të jetë me prioritet për shkak se të njëjtit duhet të vazhdojnë ushtrimin e veprimtarisë së tyre dhe kësisoj janë shumë të rrezikuar për infektim dhe përhapje të virusit për shkak të kontakteve të shumta që këta të fundit kanë. Andaj, OAK konsideron se vaksinimi i stafit është esencial, pasiqë do të ndihmonte në mos ndaljen e punës së operatorëve ekonomik të cilët për të ushtruar veprimtarinë e tyre domosdoshmërisht obligohen të udhëtojnë në vendet e Bashkimit Evropian. Kujtojmë që ditë më parë, OAK me një kërkesë të tillë i është drejtuar edhe Kryeminsitrit Kurti dhe Institucioneve relevante, me qëllim që sa më parë të gjendet mundësia dhe të fillojë vaksinimi i të punësuarve të sektorit privat”, është bërë e ditur në një komunikatë nga OAK.