Partia Demokratike në Shqipëri depozitoi sot në KQZ dosjet voluminoze me fakte që sipas saj provojnë tjetërsimin e vullnetit të shqiptarëve në 9 qarqe dhe vjedhjen më të madhe të zgjedhjeve në Shqipëri. Përfaqësuesja ligjore e PD, Marinela Ziu, tha se bëhet fjalë për prova që provojnë qartë masakrën elektorale në 25 prill.

Partia Demokratike kërkon pavlefshmëri të zgjedhjeve në 9 qarqe.  Departamenti Juridik dorëzoi në Komisionin Qendror të Zgjedhjeve dosje voluminoze me fakte  ku pretendojnë tjetërsimin e vullnetit të shqiptarëve, nëpërmjet blerjes dhe shantazhimit të votuesve.

Marinela Ziu: Procesi i 25 prillit ishte nje masaker elektorale e orkestruar dhe zbatuar nga regjimi Rama-Doshi-Rakipi. Viktimat e kesaj masakre elektorale janë shqiptarët dhe familjet e tyre. Detyra e Partisë Demokratike është të qëndrojmë fort dhe të vendosur dhe të luftojmë me të gjitha fuqitë për kthimin e demokracisë në vend.

Sot, ne po dorëzojmë në KQZ qindra prova fakte dhe të dhëna që provojnë tjetërsimin e vullnetit tê shqiptarëve dhe vjedhjen më të madhe të zgjedhjeve në Shqipëri. Nga blerja e votave dhe presioni ndaj votuesve, tek vjedhja e të dhënave personale të qytetarëve nga partia-shtet dhe përdorimi i tyre për presione kriminale nga sistemi i patronazhisteve te partise shtet.

Nga angazhimi i shtetit dhe administrates, tek tenderat, punesimet, legalizimet dhe pagesat e paligjshme per te blëre vota. Nga kandidimi i përfaqësuesve të krimit të organizuar tek perdorimi i bandave per te blere vota dhe kercenuar qytetaret nen mbrojtjen dhe mosveprimin e policise dhe prokurorise.

Nga ndryshimet antikushtetuese te Kodit Zgjedhor, tek ndryshimet me urdher politik te fletes se votimit  qe sollen zhvleftesimin e 83 mije votave baraz me afersisht 8 deputete. Nga pamundesimi i votes se emigranteve tek karantina 3 ditore per te penguar emigrantet te vijne fizikisht për te votuar.

Kjo betejë sipas përfaqësuesve të Partisë Demokratike nuk bëhet për partitë opozitare por për të ardhmen e vendit.

Marash Logu: Siç e pamë gjatë zgjedhjeve, regjimi Rama-Doshi sundon gjithë sistemin shtetëror në vend, dhe e përdor atë për përfitimet e tij politike. Këtu përfshihet edhe KAS i cili vendosi fletën e votimit sipas urdhrit politik të Edi Ramës. Por është detyra jonë të shpalosim gjithë dëshmitë dhe dokumentet që kemi dhe të vazhdojmë betejën për të vërtetën dhe për qytetarët shqiptarë në të gjitha frontet, mënyrat dhe mundësitë që ekzistojnë.  Kjo betejë nuk ka të bëjë me PD apo me partitë politike, ajo ka të bëjë me të ardhmen tonë, fëmijët tanë, demokracinë tonë. Dhe përfundimi i saj do të jetë i qartë: përmbysja e regjimit Rama-Doshi-Rakipi dhe kthimi i Shqipërisë shqiptarëve.

Nga beteja për shpalljen e pavlefshme të zgjedhjeve janë përjashtur tri qarqe ku Partia Demokratike kishte rezultat pozitiv, Dibra, Lezha dhe Kukësi.

Dosjet përmbajnë fakte të pretenduara nga blerja e votave dhe presioni ndaj votuesve, tek vjedhja e të dhënave personale të qytetarëve, angazhimi i shtetit dhe administratës, tek tenderat, punësimet, legalizimet dhe pagesat e paligjshme për të blëre vota.

Gjithashtu me emra përmenden kandidatët që sipas selisë blu përfaqësuan krimin e  organizuar në zgjedhje./oranews