Pengimi arbitrar i punës në disa ndërmarrje private

Kërkohet të mos abuzohet me ngritjen e çmimeve në këto ditë të vështira

Oda Ekonomike e Kosovës dhe Oda Ekonomike Amerikane në Kosovë shprehin shqetësimin lidhur me pengimin e punës së veprimtarive ekonomike anembanë vendit në kundërshtim me vendimin e djeshëm të Inspektoratit të Tregut, i cili në mënyrë të qartë ceku veprimtaritë ekonomike që mund të vazhdojnë punën edhe pas marrjes së masave parandaluese kundër COVID-19.

Sipas tyre, veprimet e tilla arbitrare ndikojnë në rritjen e konfuzionit të shkaktuar ditëve të fundit, por edhe në rritjen e pakontrolluar të panikut nga ana e qytetarëve.

Kryetari i Odës Ekonomike të Kosovës, Berat Rukiqi dhe Drejtori Ekzekutiv i Odës Ekonomike Amerikane në Kosovë, Arian Zeka u takuan me kryeinspektorin e tregut, Lulzim Syla për të përcjellë këto shqetësime të bizneseve dhe rëndësinë e mos ndërprerjes së veprimtarisë ekonomike, për shkak të pasojave të cilat kjo mund të ketë në ekonominë e vendit.

Kryeinspektori Syla në anën tjetër, konfirmoi se vendimi i djeshëm i shpërndarë përmes një qarkoreje të Inspektoratit të Tregut mbetet ende i vlefshëm.

Oda Ekonomike e Kosovës dhe Oda Ekonomike Amerikane në Kosovë u bëjnë thirrje autoriteteve komunale, Policisë, si dhe të gjitha trupave inspektuese që të respektojnë vendimin e Qeverisë dhe Inspektoratit të Tregut dhe të mos ndërhyjnë në mënyrë arbitrare duke penguar punën e ndërmarrjeve private, të cilat janë jetike në ruajtjen e furnizimit normal për qytetarët.

Po ashtu, Oda Ekonomike e Kosovës dhe Oda Ekonomike Amerikane në Kosovë kërkojnë nga Qeveria që të aprovojë vendimin për planin e masave që do të lehtësonin operimin e bizneseve në këto ditë të situatës emergjente, sipas propozimit të bërë gjatë ditës së djeshme.

Në anën tjetër, të dyja institucionet thërrasin ndërmarrjet tregtare që të veprojnë gjithashtu me përgjegjshmëri duke mos abuzuar me ngritjen e çmimeve në këto ditë të vështira.