Përfaqësuesi i Kosovës për kontakt me Vatikanin: Marrëdhëniet me Selinë e Shenjtë janë ngritur në nivel të lartë

Përfaqësuesi i Kosovës për kontakt me Vatikanin, Vehbi Miftari  reagoi pasi presidentja Vjosa Osmani ka dekretuar sot formalisht hapjen e Misionit të Posaçëm të Republikës së Kosovës në Selinë e Shenjtë.

Ai në Facebook shkroi  se  marrëdhëniet me Selinë e Shenjtë tani janë ngritur në nivel të lartë.

“I lumtur që marrëdhëniet me Selinë e Shenjtë janë ngritur në nivel të lartë, falë përkushtimit para së gjithash të presidentes së vendit, dr. Vjosa Osmanit dhe institucioneve të tjera. Hapja e Misionit të Posaçëm është dëshmi e këtij përkushtimi të pafund”, ka thënë Miftari.

Presidentja Vjosa Osmani ka dekretuar sot formalisht hapjen e Misionit të Posaçëm të Republikës së Kosovës në Selinë e Shenjtë.

Osmani e ka cilësuar këtë si hap i rëndësishëm për Kosovën dhe raportet me Selinë e Shenjtë.

“Pas dy vitesh pune intensive me Selinë e Shenjtë, kam dekretuar formalisht hapjen e Misionit të Posaçëm të Republikës së Kosovës në Selinë e Shenjtë. Ky është hap i rëndësishëm për Kosovën dhe raportet tona me Selinë e Shenjtë, të cilat do të vazhdojmë t’i thellojmë”, tha Osmani në një postim në “Facebook”./21Media