Pfizer konfirmon marrëveshjen me Kosovën për vaksina
Gjiganti farmaceutik Pfizer ka konfirmuar për rel, marrëveshjen e arritur me Qeverinë e Kosovës për furnizim me vaksina kundër COVID-19, sëmundjes që shkakton koronavirusi.
Megjithatë në përgjigje janë ofruar pak detaje mbi marrëveshjen.
Aty është thënë se sasia dhe periudha e dërgimit të vaksinave në Kosovë mbetet konfidenciale.
“Marrëveshjet për dozat dhe kohën e dërgesave arrihen në pajtueshmëri me qeveritë, ashtu sikurse dhe Qeverinë e Kosovës dhe detajet janë konfidenciale”, është thënë në përgjigje.
Kryeministri i Kosovës Albin Kurti ka thënë të premten përmes një postimi në Twitter se këto doza vaksinash do të dërgohen në Kosovë deri në fund të vitit.
The agreement w/ Pfizer has been reached! Over 1.2 milion doses will arrive by the end of the yr, meaning that our target to vaccinate 60% of the population will be achieved. Hopeful than ever, yet we shall keep certain preventive measures against COVID-19. Better days are ahead.
— Albin Kurti (@albinkurti) May 28, 2021
Më 28 maj, ministri i Shëndetësisë Arben Vitia ka thënë se Kosova pret që deri në fund të vitit të pranojë 1.213.290 doza të vaksinës së kompanisë Pfizer.
Kjo është kontrata e parë që Kosova ka arritur të nënshkruajë me ndonjë kompani farmaceutike për sigurimin e vaksinave kundër koronavirusit.