Facebook dhe Messenger me rregulla të reja për adoleshentët

Meta ka filluar të kalojë adoleshentët që përdorin Facebook dhe Messenger në llogari të reja të dizajnuara posaçërisht për ta, me më shumë masa sigurie dhe mundësi mbikëqyrjeje nga prindërit.

Të gjithë përdoruesit adoleshentë do të kalojnë automatikisht në këto llogari të reja, të cilat janë bërë të detyrueshme për këtë kategori. Gjithashtu, për adoleshentët e moshës 13 deri në 15 vjeç, kërkohet leje prindërore për të bërë ndryshime në cilësimet e sigurisë.

Meta bën të ditur se përdor inteligjencën artificiale për të identifikuar përdoruesit që mund të japin informacione të pasakta për moshën. Llogaritë e reja lejojnë prindërit të monitorojnë mënyrën si fëmijët e tyre përdorin platformat, duke përfshirë funksione për kontrollin e kohës së kaluar para ekranit dhe mbikëqyrjen e kontakteve me të cilët ata komunikojnë.

Për më tepër, këto llogari janë të pajisura me cilësime më të forta privatësie dhe sigurie, me qëllim kufizimin e ndërveprimeve mes adoleshentëve dhe të rriturve të panjohur.

Në të njëjtën kohë, Instagram po zgjerohet me programin e tij për të ndihmuar shkollat fillore dhe të mesme në SHBA që të raportojnë më shpejt rastet e ngacmimit dhe sjelljeve problematike. Deri tani, kjo nismë është zbatuar në bashkëpunim me një grup të përzgjedhur shkollash nëpërmjet një “programi partneriteti shkollor”.