Ministri Hamza e quajti Albulena Haxhiun juriste të dobët

Fjalosje ndërmjet Bedri Hamzës dhe Albulena Haxhiut

Deputetja e Vetëvendosjes, Albulena Haxhiu dhe ministri i Financave nga radhët e PDK-së, Bedri Hamza janë përplasur sot gjatë seancës së Kuvendit lidhur me çështjen e shpenzimit të buxhetit për vitin 2019.

Haxhiu ka deklaruar se ministri Hamza ka bërë vepër penale duke shkelur ligjin për financat publike. Ajo ka kërkuar llogari nga Hamza për vlerat e shpenzuara, që ajo i ka quajtur në mënyrë jo ligjore.

Deputetja e VV-se ka pyetur ministrin e Financave se sipas cilës bazë ligjore po i vijon shpenzimet e buxhetit të shtetit në vitin 2019, meqë Kuvendi ende nuk e ka miratuar buxhetin për këtë vit.

Hamza duke u thirrur në legjislacionin në fuqi ka thënë se për muajin janar 2019 buxheti është dhënë në dispozicion, në bazë të ndarjeve buxhetore të ligjit numër 06L-020 për buxhetin e Kosovës për vitin 2018.

Ndërsa, Haxhiu ka thënë se vetëm Kuvendi me anë të një vendimi mund të autorizojë zgjatjen e buxhetit për tre muaj.

“Unë do të doja që të lexoja nenin 24, paragrafi 2 i ligjit për menaxhimin e financave publike, që thotë ‘vetëm Kuvendi me anë të një vendimi mund ta autorizojë zgjatjen e ligjit për ndarjet buxhetore të vitit të kaluar fiskal’. Ligji për ndarjet buxhetore të vitit të kaluar fiskal në asnjë rast nuk mund të zgjatet për më shumë se 3 muaj të vitit të ardhshëm fiskal, që nënkupton deri në mars. Por, të drejtën për ta zgjatur e ka vetëm Kuvendi i Republikës së Kosovës, zoti ministër a e ka bërë këtë Kuvendi i Republikës së Kosovës? Pra ju jeni duke e shkelur ligjin për menaxhimin e financave publike, ju po bëni vepër penale, dhe na njoftoni sa është vlera që keni shpenzuar në mënyrë jo ligjore deri tani”, ka thë Haxhiu.

Si përgjigjie, ministri Hamza e ka quajtur Haxhiun juriste të dobët, duke i thënë që mos ta bllokoi komisionin me qëllim të pamundësimit të aprovimit të buxhetit.

“Zonja Haxhiu me sa e di unë je juriste dhe me folë diçka çka të niva tash, sinqerisht është çudi, seriozisht u befasova, lexo ti sa dush ligjin, edhe unë e lexova ligjin, e nuk je ti më e mirë se shumë juristë që e kanë interpretuar e nuk është hera e parë që ndodh në Kosovë. Por unë e kam një lutje tjetër për ty zonja Haxhiu mos e blloko komisionin që me pamundësuar aprovimin e buxhetit në Kuvendin e Republikës së Kosovës, mos i dëmto qindra mijëra pensionistë që me i marrë pensionet me rritje, mos u bë destruktive dhe mos shkakto pengesa sepse ke obligim me kry punën tënde si deputete, kryeje punën. Ti je aq juriste e dobët sa të gjitha rastet që ti i ke paraqit dhe prezantuar gjykata t’i ka hedh poshtë dhe ka me t’i hedh poshtë sepse nuk ke lidhje me profesionin që ti konsideron që je një juriste”, ka thënë Hamza.

Në seancën e nesërme të kuvendit pritet të votohet buxheti për vitin 2019.