Thaçi ripërsërit se është koha të arrihet marrëveshja me Serbinë

Sipas Thaçit, nuk do të ketë as “Shqipëri të madhe”, as “Kosovë të madhe”

Presidenti i vendit, Hashim Thaçi ka ripërsëritur se duhet të shfrytëzohet koha që tani Kosova të arrijë një marrëveshje me Serbinë, e cila sipas tij, nënkupton që kurrë nuk do të ketë më luftë ndërmjet dy vendeve.

I pari i Kosovës, siç ka theksuar për agjencinë e lajmeve “APA” është shprehur se nga arritja e një marrëveshjeje me shtetin serb qytetarët do të kenë jetë më të mirë dhe kushte më të mira për punë, sipas modelit evropian.

“Në një intervistë për Agjencinë e Lajmeve të Austrisë „APA“, kam biseduar për zhvillimet politike në Kosovë dhe rajon. Duke folur për fazën e fundit të dialogut për normalizimin e marrëdhënieve ndërmjet Kosovës dhe Serbisë, kam theksuar se një marrëveshje mes nesh do të krijonte më shumë stabilitet dhe paqe në rajon. Për Kosovën dhe Serbinë kjo do të mundësojë anëtarësimin në BE, derisa për Kosovën edhe në NATO. Nuk do të ketë kufij monoetnik dhe të dyja shtetet do të jenë shumetnike. Arritja e një marrëveshjeje ligjërisht obliguese, nënkupton që nuk do të ketë më kurrë luftë ndërmjet dy shteteve. Qytetarët do të kenë një jetë më të mirë, sepse nga jetësimi i marrëveshjes do të përmirësohet edhe gjendja ekonomike dhe do të krijohen më shumë vende të punës, derisa kufijtë do të largohen, duke u bazuar në modelin evropian”, ka shkruar Thaçi në facebook.

Presidenti ka theksuar se duhet të shfrytëzohet momentumi i tanishëm që të arrihet marrëveshja me Serbinë.

“Shansi për të arritur një marrëveshje të tillë asnjëherë nuk ka qenë më i mirë, sepse kemi mbështetjen e BE-së dhe SHBA-së. Risia është që edhe Rusia do të jetë në gjendje të pranojë marrëveshjen, nëse të dyja palët pajtohen. Prandaj, është me rëndësi që të shfrytëzohet ky momentum për të arritur një marrëveshje të balancuar, e cila merr parasysh interesat e dy vendeve. Në të kaluarën nuk ka pasur një gatishmëri të tillë. Nëse ne nuk e shfrytëzojmë këtë shans, atëherë qytetarët tanë do të na mallkojnë në dekadat e ardhshme. Kjo marrëveshje nuk ka të bëjë vetëm me korrigjimin e kufijve, por edhe me aspekte të tjera”, ka shtuar më tutje ai.

Sipas Thaçit, marrëveshja me shtetin serb do të jetë gjithëpërfshirëse, e cila, sipas tij trajton edhe çështje të tjera, si çështjen e personave të zhdukur nga lufta e fundit, të cilët edhe më tutje nuk janë kthyer në vendlindje.

“Marrëveshja ka për qëllim të zgjidhë përfundimisht problemet dhe të mos jetë një zgjidhje e përkohshme, të cilës pastaj duhet t’i rikthehemi. Nuk do të ketë as “Shqipëri të madhe”, as “Kosovë të madhe”. Në vend të kësaj, ne synojmë integrimin e rajonit në Evropën e bashkuar. Në këtë intervistë kam folur edhe për ushtrinë e Kosovës. Ky ishte një vendim i duhur i një shteti sovran, i bazuar në vullnetin e popullit të Kosovës”, ka përfunduar Thaçi shkrimin në facebook.

Ndërkohë, kryeparlamentari Kadri Veseli ka ftuar më 14 janar në një takim të përbashkët presidentin, kryeministrin, ekipin negociator, si dhe përfaqësuesit e grupeve parlamentare nga partitë opozitare ende të papërfaqësuara në ekipin negociator, LDK dhe VV, për t’u koordinuar për procesin e dialogut me Serbinë. Në atë takim ka munguar presidenti, si dhe LDK e VV./21Media