Procesi i votimit po shkon në rregull në Leposaviq

Procesi i votimit po shkon në rregull edhe në Leposaviq. Në garë për të parin e Komunës së Leposaviqit janë dy kandidatë, Zoran Todiç i Listës Serbe dhe Shaqir Hetemi i Partisë Demokratike të Kosovës (PDK).
Në këtë komunë janë 25 vendvotime me 18 qendra votimit. Të drejtë vote kanë 12 mijë e 707 qytetarë.
Qytetarët do të votojnë për të parin e komunës, në të cilën ata jetojnë.
Materiali zgjedhor është përgatitur siç duhet dhe priten votuesit e parë.
Një qytetare, e cila hedhi votën e saj tha se presin ndryshim e ku presin të përfshihen më shuëm të rinjtë.
“Të përfshihen të rinjtë më shumë, më shumë të besojnë, ja kjo që ata të besojnë”, tha ajo.
Qytetari tjetër shpreson që udhëheqja e ardhshme të krijojë paqe.
“Ndoshta do të përpiqen të jetë më mirë dhe të mos ketë konflikte”, u shpreh ai.
Lista përfundimtare e votuesve për Zgjedhjet Lokale 2021 përmban 1 milion e 885 mijë e 448 emra të votuesve, apo 90 mijë e 586 votues më shumë në krahasim me zgjedhjet e parakohshme për Kuvendin e Kosovës që janë mbajtur më 14 shkurt 2021. Numri i votuesve të rinj, të cilët do të votojnë për herë të parë është: 41 mijë e 12 votues, prej të cilëve 24 mijë e 697 kanë arritur moshën 18 vjeç pas datës 14 shkurt 2021 dhe 8 mijë e 937 votues, të cilët mund të konsiderohet se janë regjistruar për herë të parë në regjistrin qendror civil pas zgjedhjeve të fundit parlamentare.