“Promovimi i Ujmanit si zonë për larje”, IKD kërkon llogaridhënie institucionale për vdekjen e 33-vjeçarit

Instituti i Kosovës për Drejtësi (IKD) ka kërkuar llogaridhënie institucionale lidhur me vdekjen tragjike të një 33-vjeçari, i cili u mbyt në Liqenin e Ujmanit.

Ky i ri u raportua se kërceu nga ura dhe u mbyt në Liqenin e Ujmanit. Trupi i tij u gjet vetëm tri ditë më vonë nga ekipet e specializuara të kërkim-shpëtimit të Forcës së Sigurisë së Kosovës.

Në reagimin e IKD-së thuhet se “promovimi i Liqenit të Ujmanit si zonë për larje, mungesa e sinjalistikës për ndalimin e larjes dhe mos reagimi institucional, mund të ishin faktorë drejt vdekjes tragjike të 27 korrikut”.

IKD ka kërkuar që të iniciohet menjëherë një hetim institucional lidhur me këtë rast.

“Sipas Ligjit për Ujërat e Kosovës, Ministria e Mjedisit, Planifikimit Hapësinor dhe Infrastrukturës (MMPHI) në bashkëpunim me Ministrinë e Shëndetësisë, Komunat dhe Kompanitë e ofrimit të shërbimeve të ujit, me akt nënligjor cakton zonat për larje. Sipas Udhëzimit Administrativ Nr. 20/2015 për kriteret për zonat për larje, ky obligim është dashur që të përmbushet më së largu deri në vitin 2018. Përcaktimi i një zone të caktuar për larje, sipas këtij Udhëzimi Administrativ, tërheq pas vetës obligimin e ndërmarrjes së nëntë (9) masave menaxhuese”, thuhet në reagimin e IKD-së.

Më tej, thuhet se deri më tani nuk ka asnjë njoftim publik nëse ajo zonë në Liqenin e Ujmanit është për larje.

“Për më tepër, nuk ekzistojnë njoftimet nëse larja në këtë zonë është e lejuar apo e ndaluar. Ndërkaq, situata faktike është se tash e një kohë ky liqen është duke u përdorur për larje nga qytetarët. Institucionet e Republikës së Kosovës në vend të përmbushjes së obligimeve ligjore përkitazi me caktimin e zonave për larje dhe ndërmarrjen e masave menaxhuese, siç kërkohet me Ligj dhe Udhëzim Administrativ, kanë proklamuar liqenin si zonë për larje. Zyrtarë qeveritarë, përfshirë deputetë dhe ministra, kanë shkuar vet në liqenin e Ujmanit dhe kanë shpërndarë publikisht pamje të njerëzve që lahen në liqenin e Ujmanit, duke e paraqitur atë si vend të pushimit dhe duke lënë të nënkuptohet për qytetarët se kjo është zonë për larje”, theksohet më tej në këtë reagim.

Instituti i Kosovës për Drejtësi ka thënë se mos përmbushja e Ligjit për Ujërat dhe Udhëzimeve Administrative “mund të implikojë edhe përgjegjësinë e institucioneve publike”.

“Sipas Gjykatës Evropiane për të Drejtat e Njeriut (GjEDNJ), neni 2 i Konventës Evropiane për të Drejtat e Njeriut i obligon shtetet jo vetëm që të përmbahet nga marrja e jetës “qëllimisht”, por edhe të ndërmarrin masat e nevojshme për mbrojtjen e jetës së personave që janë nën juridiksionin e tyre”, thuhet në reagim.

Dje, pasdite është gjetur trupi i pajetë i 33-vjeçarit në Liqenin e Ujmanit, mbështetur në kërkim nga Forca e Sigurisë së Kosovës.