Putin dhe Xi në samitin e G20

Xi Jinping i Kinës dhe Vladimir Putin i Rusisë planifikojnë të marrin pjesë në samitin e Grupit 20 në Bali në nëntor, thotë presidenti indonezian Joko Widodo.
“Xi Jinping do të vijë. Presidenti Putin gjithashtu më ka thënë se do të vijë,” tha Widodo, i njohur gjithashtu si Jokowi, për Bloomberg News në një intervistë.
Ky është konfirmimi i parë që të dy liderët do të marrin pjesë në samit, përcjell portali rtv21.tv
Ky do të jetë samiti i parë global që nga pushtimi rus i Ukrainës dhe tensionet e rritura mbi Tajvanin.
Do të ishte gjithashtu hera e parë që Xi largohet nga Kina që nga janari 2020 kur vendi mbylli kufijtë e tij në fillim të pandemisë Covid. Që atëherë, ai u largua vetëm nga kontinenti për të shënuar 25 vjetorin e kthimit të Hong Kongut në Kinë më 1 korrik të këtij viti.
Samiti i nëntorit do të jetë i shumëpritur duke qenë se pritet të marrë pjesë edhe presidenti amerikan Joe Biden – është e paqartë nëse ai do të takohet me Putinin.
Por raportet kanë lënë të kuptohet për mundësinë e një takimi ballë për ballë midis zotit Biden dhe zotit Xi së shpejti – përpara samitit ose në margjinat e tij.
Marrëdhëniet midis Uashingtonit dhe Pekinit janë acaruar për shkak të të drejtave të njeriut, tregtisë dhe së fundmi vizitës së politikanes amerikane Nancy Pelosi në Tajvan – udhëtimi historik e shtyu Kinën të kryente gati një javë stërvitje ushtarake rreth ishullit të vetëqeverisur, të cilin ajo pretendon si pjesë e saj./21Media