Rama i reagon Muratit: Puna ime po u pengon disa ministrave të Kurtit
Kryetari i Komunës së Prishtinës, Përparim Rama, ka reaguar ndaj Ministrit të Financave, Hekuran Muratit, rreth projektit Solar4Kosovo, për të cilën Murati ka akuzuar Ramën se po i merr meritat për punën e të tjerëve.
Rama në Facebook ka shkruar se tash e sa kohë, puna e tij po u pengon disa ministrave të Qeverisë Kurti.
“Një prej këtyre sulmeve ndodhi edhe dje, kur Kryeqyteti nënshkroi marrëveshje bashkëpunimi me Komunën e Obiliqit, për realizimin e projektit të Ngrohjes Diellore “Solar4Kosovo”. Me anë të kësaj marrëveshjeje ne si Kryeqytet kemi marrë përgjegjësinë që të kryejmë obligimet financiare që do të dalin nga procesi i shpronësimit të pronave të cekura në marrëveshje, sepse pa këtë shpronësim nga ana e Kryeqytetit nuk bëhet projekti”, ka shkruar Rama.
Më tej i pari i Prishtinës ka shkruar se , Kryeqyteti dhe Komuna e Obiliqit, kanë punuar 18 muaj në mënyrë intenzive, dhe në këtë proces kemi bashkëpunuar me Ministrinë e Mjedisit, për ta rregulluar jetën e qytetarëve.
Ai ka thënë se njëjtë ka ndodhur edhe për Lojërat Mesdhetare, duke shtuar se ko gjuhë e përdorur nga ministra të caktuar të Qeverisë përveç se e dëmton organizimin e këtyre Lojërave, e prish edhe imazhin e Kosovës.
“Më tutje, këta ministra: i mbajtën afër 30 milionë Euro buxhet të Kryeqytetit në mënyrë të padrejtë deri në muajin korrik 2023; nuk e përfshinë Kryeqytetin në përzgjedhje të projekteve të mëdha infrastrukturore siç është Salla e Operas dhe Baletit; vazhdojnë të bllokojnë projektin e Unazës së Kryeqytetit; dhe vazhdimisht refuzojnë kërkesat për bashkëpunim.Prandaj, si Kryetar i Kryeqytetit do të vazhdoj punën me përkushtim për transformimin e Kryeqytetit në frymë bashkëpunuese dhe ju bëj thirrje ministrave përkatës të ndryshojnë qasjen në raport me Prishtinën dhe të angazhohen për të mirën e të gjithë qytetarëve pa dallim”, ka shkruar Rama në Facebook./21Media
Dëshiron ta dëgjosh këtë lajm me zë?