Vrasja e shtatzënës, sot mblidhet grupi ndërministror

Një grua shtatzënë u vra nga bashkëshorti i saj në oborrin e Klinikës së Gjinekologjisë në QKUK.

Kjo vrasje ngjalli reagime të shumta, e lidhur me këtë sot në orën 8:30 do të mblidhet grupi ndërministror që do të raportojë për veprimet institucionale, sa i përket këtij rasti.

Kjo u bë e ditur nga Ministrja e Drejtësisë, Albulena Haxhiu pasi dënoi këtë krim.

“Një grua dhe foshnja që priste ta sillte në jetë u vranë tek shkallët e repartit të gjinekologjisë. Krim i rëndë, vrasje e dyfishtë! Brenda 5 ditëve dy gra të vrara nga bashkëshortët. Gruaja që priste fëmijën të sillte në këtë botë, vritet nga burri i saj, në vendin ku lindin fëmijët e vendit tonë, ku gratë bëhen nëna, nga atje ku lindë një jetë e re. Me shpresën për një botë më të mirë. Një grua që duhej të mbrohej. Ajo u shua. U shua bashkë me fëmijun ende të pa lindur. Këto krime të rënda na bëjnë të kuptojmë që femicidi është i përhapur në shoqërinë tonë. Rastet si ky na bëjnë të kuptojmë që pavarësisht veprimeve që kemi ndërmarrë, kemi edhe shumë punë për të bërë.Lufta me femicidin mund të jetë e vështirë por nuk guxojmë të humbim shpresat por të bashkohemi si institucione dhe si shoqëri për luftimin e femicidit që po merr jetët e grave”, ka shkruar Haxhiu në Facebook.

Për vrasjen e shtatzënës ka reaguar dhe kryeministri Albin Kurti, presidentja, Vjosa Osmani, përfaqësues të opozitës, përfaqësues të OJQ-ve e të tjerë.

Vrasja e kësaj gruaje vjen pa u bërë ende një javë nga vrasja e arsimtares nga bashkëshorti i saj në Prishtinë./21Media

Artikuj të ngjashëm

Back to top button
close button