Sa ministra të qeverisë Kurti janë vaksinuar me Astra Zeneka?

Varianti Delta ka shfaqur një valë të re të pandemisë duke rritur numrin e të infektuarave dhe numrin e personave që po humbin jetën nga ky virus. Në betejën me Covid-19 si arma më e mirë mbrojtëse momentalisht është vaksinimi.
Po bëhen pesë muaj që prej arritjes së kontingjentit të parë të vaksinave antiCovid-19 në Kosovë, por deri më tani janë vaksinuar me të dy dozat rreth 270 mijë persona.
Në Kosovë është shfaqur një hezitim për të marrë vaksinën Astra Zeneka. Minsitri i Shëndetësisë Arben Vitia bëri të ditur se në stoqe momentalisht ka më shumë vaksina të Astra Zenkes.
Ai bashkë me Kryeministrin e Kosovës Albin Kurtin apeluan te qytetarët që të mos përcaktohen vetëm për vaksinimin Pfizzer por, të zgjedhin edhe vaksinën Astra Zeneka. Vitia potencoi se kjo vaksinë është po aq e sigurt sa edhe vaksina Pfizzer.
Vet kryeministri Albin Kurti i cili ka qenë i pari që ka marrë vaksinën e parë në Kosovë është vaksinuar me dy dozat e Astra Zeneka. Përveç Kurtit me vaksinën Astra Zeneka janë vaksinuar pesë ministra nga kabineti qeveritar. Në mesin e tyre janë, Ministri i Shëndetësisë Arben Vitia, Ministri i Mjedisit dhe Planifikimit Hapësinor dhe Infrastrukturës, Liburn Aliu, Ministrja e Arsimit Arbërie Nagavci, Ministrja e Ekonomisë Artane Rizvanolli dhe Ministri i Punëve të Brendshme, Xhelal Sveçla.  Së paku janë këta pesë ministra që e kanë bërë publike në rrjetet e tyre sociale se janë vaksinuar me vaksinën Astra Zeneka.
Nga kabineti qeveritar që janë vaksinuar kanë bërë publike edhe tre ministra të tjerë edhe pse ata nuk kanë treguar cilën vaksinë e kanë marrë, në mesin e tyre janë, Ministrja e Drejtësisë, Albulena Haxhiu, Ministri i Mbrojtjes, Armend Mehaj, Ministrja e Industrisë Ndërvarësisë dhe Tregtisë Rozeta Hajdari. Ata kanë ftuar qytetarët që po ashtu të marrin vaksinën. Po në mesin e të vaksinuarve është edhe Presidentja Vjosa Osmani dhe Kryetari i Kuvendit Galuk Konjufca.
Ndërsa shtatë ministra e mbetur të kabinetit qeveritar nuk kanë bërë publike se a janë vaksinuar.
Sipas njoftimeve zyrtare, vaksina Astra Zeneka për COVID-19 nuk përmban asnjë virus të gjallë SARS-COV-2, dhe nuk mund t’ju japë COVID-19. Vaksina Astra Zeneka për COVID-19 është e përshtatshme për njerëzit e moshës 18 vjeç e lart, me disa përjashtime të specifikuara në këtë fletë informacioni.
Ministri i Shëndetësisë Arben Vitia ka premtuar se së shpejti do hapet prapë sistemi për aplikim për të marrë vaksinën, pasi që janë në pritje të pranimit të një numri të vaksinave Astra Zeneka dhe Pfizzer.
Dje ishte ditë e zezë për Kosovën, pasi u shënuan 36 viktima nga COVID-19, numri më i lartë i të vdekurve në ditë që kur u shfaq pandemia në mars të vitit 2020. /21Media