Shpend Ahmeti në ditën e fundit si kryetar: Për 8 vjet përmirësuam jetën në Prishtinë
Në një postim lamtumirës, Shpend Ahmeti ka numëruar sukseset që janë arritur gjatë mandatit të tij si kryetar i Prishtinës, e të cilat sipas tij “kanë përmirësuar dukshëm jetën në Kryqytet”.
Ahmeti ka edhe një porosi për pasardhësin e tij të zgjedhur nga radhët e LDK-së, Përparim Ramën.
“Përparimin e njoh moti dhe e kam mik. Sa here kam qenë në Londër më ka pritur e përcjellur. Më ka ndihmuar në çdo pyetje që kam pas dhe është angazhuar maksimalisht e vullnetarisht në ide urbanistike, si salla koncertale, Ulpiana, Qendra e Manifesta. Ka organizuar shumë gjëra për komunitetin Shqiptar në Angli dhe këmbën nuk e ka larguar asnjëherë nga Kosova me punë, vullnetarizëm e ndihmë. Atij i dëshiroj të gjitha të mirat. I kam thënë se nuk do ti përzihem asnjëherë në punë por do ti përgjigjem për çdo kërkesë. Sic ka thënë Ali Zatriqi me rastin e pensionimit nga Televizioni kur i është dhuruar një orë dore – unë që po dal po e di sa është sahati po ju që po metni“, ka shkruar ai.
Ahmeti i ka falënderuar të gjithë ata që e kanë mbështetur dhe kritikuar gjatë kësaj periudhe tetë vjeçare në krye të Prishtinës.
Nesër, do të bëhet pranim-dorëzimi ceremonial i detyrës së kryetarit të Prishtinës, nga Shpend Ahmeti tek Përparim Rama. / 21Media