Sindikalistët kërkojnë takim urgjent me krerët e shtetit
Një ditë pas dërgimit të Ligjit për Paga nga Avokati i Popullit në Gjykatë Kushtetuese
Sindikata e Arsimit, e Shëndetësisë dhe e Policisë së Kosovës kërkojnë takim urgjent me krerët më të lartë të shtetit. Ky takim është kërkuar një ditë pas dërgimit të Ligjit për Paga nga Avokati i Popullit në Gjykatë Kushtetuese.
“Ky takim kërkohet me qëllim të informimit nga ana e tri sindikatave për pasojat e mundshme në rast të mos implementimit të Ligjit të Pagave. Takimi duhet të mbahet më së largu deri të martën”, thuhet në deklaratën e përbashkët të tri sindikatave nënshkruar nga kryetarët Rrahman Jasharaj nga SBASHK, Blerim Syla nga FSHK dhe Shaban Tasholli nga Sindikata e Policisë.
Këto tri sindikata kanë kërkuar takim me presidentin e Kosovës, Hashim Thaçi, kryeministrin në detyrë Ramush Haradinaj, kryetarët e partive politike Albin Kurti, Isa Mustafa, Kadri Veseli dhe Fatmir Limaj.
Avokati i Popullit e ka dërguar në Gjykatën Kushtetuese Ligjin për Pagat në Sektorin Publik. Këtë thotë se e ka bërë në pajtim me autorizimet e tij kushtetuese dhe ligjore, e për synim e ka vlerësimin e përputhshmërisë së këtij Ligji me Kushtetutën./21Media