S’ka kuorum, ndërpritet seanca e Kuvendit
(Lajm i përditësuar)
Kuvendi i Kosovës ka ndërprerë seancën në mungesë të kuorumit.
Pasi që është konstatuar se në votimin e fshehtë për zgjedhjen e një anëtari të Bordit për Ankesa të Mediave, kanë marr pjesë vetëm 60 deputetë, seanca është ndërprerë.
Kryetari i Kuvendit, Glauk Konjufca ka thënë se seanca do të vazhdojë të enjten.
LDK dhe AAK pajtohen me qeverinë për çështjen e të hyrave vetanake të komunave
Lidhja Demokratike e Kosovës dhe Aleanca për Ardhmërinë e Kosovës kanë arritur sot të pajtohen me qeverinë lidhur me çështjen e të hyrave vetanake të komunave. Të dy këto parti opozitare kanë deklaruar se do t’i rikthehen votimit në Kuvendin e Kosovës.
Ndërkaq, shefi i Grupit Parlamentar të PDK-së, Abelard Tahiri ka shprehur kundërshtinë e kësaj partie, duke thënë se nuk do marrin pjesë në votim.
“Si Grup Parlamentar i Partisë Demokratike të Kosovës ne nuk do të marrim pjesë deri në një qëndrim tonin të ardhshëm politik”, ka deklaruar Tahiri.
Në anën tjetër, shefi i deputetëve të LDK-së, Arben Gashi ka theksuar se janë dakorduar që javën e ardhshme në kuvend të shqyrtohet plotësim-ndryshimi i Ligjit për Buxhetin, ku do të mundësohet shfrytëzimi i të hyrave vetanake.
“Në bazë të asaj që diskutuam edhe me ju, u dakorduam që javën e ardhshme të vije në kuvend plotësim-ndryshimi i Ligjit për Buxhetin, ku komunave do tu mundësohet shfrytëzimi i të hyrave vetanake dhe kjo çështje do të zh’bllokohet. Duke marrë parasysh këtë dakordim, ne si grup parlamentar do të marrim pjesë në proceset në Kuvendin e Kosovës”, është shprehur Gashi.
Edhe Aleanca për Ardhmërinë e Kosovës është pajtuar për të vijuar me pjesëmarrjen në Kuvendin e Kosovës.
“Grupi i ynë parlamentar po ashtu e ka ngritur këtë çështje shumë më herët, për shkak se të hyrat vetanake janë të komunave dhe i gjithë debati ka qenë në funksion të marrjes së këtyre mjeteve në komunave. Ne kemi një dakordim nga grupi parlamentar i LVV-së dhe nga ministri Murati për këtë temë. Pra, për transferimin e të hyrave vetanake që janë të domosdoshme. Ne si Grup Parlamentar, po ashtu kemi kërkuar një interpelancë për rishikim të buxhetit që lidhet me kërkesën tonë që koeficienti të ngritet në 129 euro. Ne do të marrim pjesë në votim”, ka njoftuar shefi i Grupit Parlamentar të AAK-së, Besnik Tahiri.
Në seancën e sotme plenare, kryetarja e Grupit Parlamentar të Lëvizjes Vetëvendosje, Mimoza Kusari-Lila ka thënë se ministri i Financave, Hekuran Murati ka informuar shefat e grupeve parlamentare për rishikimin e buxhetit për vitin 2023, sipas kërkesës së asociacionit të komunave.
S’ka kuorum për votimin e Projektligjit për Shëndetin Riprodhues
Parlamenti i Kosovës ka dështuar të votojë dy projektligje në seancën e sotme plenare. Vetëm 59 deputetë kanë marrë pjesë në votimin e Projektligjit për Shëndetin Riprodhues dhe Fertilizimin e Asistuar Mjekësor, ndërkaq kuorum nuk ka pasur as për votimin e Projektligjit për Minierat dhe Mineralet.
80 deputetë kanë qenë të pranishëm në sallë gjatë votimit në parim të Projektligjit për Shëndetin Riprodhues dhe Fertilizimin e Asistuar Mjekësor.
“Vetëm 59 deputetë kanë marrë pjesë në votim. Konsideroj që ky projektligj nuk e ka kuorumin e mjaftueshëm. Kjo bartet në seancën e radhës kur nuk ka kuorum”, ka thënë kryeparlamenti Glauk Konjufca.
Vota të mjaftueshme nuk ka pasur as për Projektligjin për Minierat dhe Mineralet, ku vetëm 57 deputetë kanë marrë pjesë në votim.
Në seancën e sotme plenare është vendosur që debati për Ministrinë e Industrisë dhe Tregtisë të bartet në ditën e nesërme.
Kuvendi mblidhet sot, shqyrton pikat e papërfunduara në pesë seanca
Sot nga ora 13:00 Kuvendi i Kosovës do të mbajë seancë plenare në të cilën është paraparë të shqyrtohen pikat e papërfunduara në pesë seanca të kaluara.
Disa prej këtyre pikave janë shqyrtuar dhe vetëm pritet të votohen, kurse të tjerat do të shqyrtohen.
Rendi i ditës
I. Pikat e papërfunduara nga Seanca plenare, e mbajtur më 23 mars 2023:
6. Votimi në parim i Projektligjit nr.08/L-212 për shëndet riprodhues dhe fertilizim të asistuar mjekësor,
7. Votimi në parim i Projektligjit nr.08/L-214 për ndryshimin dhe plotësimin e Ligjit nr.03/L-163 për minierat dhe mineralet, i ndryshuar dhe plotësuar me Ligjin nr.04/L-158,
8. Shqyrtimi i Propozim-rezolutës për gjendjen në Ministrinë e Industrisë, Ndërmarrësisë dhe Tregtisë,
10. Zgjedhja e tre (3) anëtarëve të Komisionit të Pavarur të Mediave,
11. Zgjedhja e një (1) anëtari të Bordit për Ankesa të Mediave,
12. Zgjedhja e një (1) zëvendësi të Avokatit të Popullit nga radhët e komuniteteve që nuk janë shumicë në Kosovë,
13. Shqyrtimi i parë i Projektligjit nr. 08/L-210 për ndryshimin dhe plotësimin e Ligjit nr. 02/L-31 për Lirinë Fetare në Kosovë,
14. Shqyrtimi i parë i Projektligjit nr.08/L-218 për organizimin e tregut për produktet bujqësore,
15. Themelimi i Komisionit Hetimor Parlamentar në lidhje me rastet e dhunës seksuale dhe dhunës në familje në Republikën e Kosovës.
II. Pikat e papërfunduara nga Seanca plenare, e mbajtur më 6 dhe 7 prill 2023:
Votimi i Propozim-Rezolutës për punën dyvjeçare të Qeverisë së Kosovës,
Shqyrtimi i dytë i Projektligjit nr.08/L-110 për Agjencinë e Kosovës për Akreditim,
Shqyrtimi i dytë i Projektligjit nr.08/L-155 për sanksionet e shёnjestruara kundër shkelësve të huaj të drejtave të njeriut,
Shqyrtimi i dytë i Projektligjit nr.08/L-201 për ndryshimin dhe plotësimin e Ligjit nr.05/L-081 për energjinë,
Shqyrtimi i parë i Projektligjit nr.08/L-160 për pensionet e zyrtarëve policor të Policisë së Kosovës dhe punonjësit e Inspektoratit Policor të Kosovës me autorizime policore,
Shqyrtimi i parë i Projektligjit nr.08/L-220 për çmimin e produkteve medicinale,
Shqyrtimi i rekomandimit lidhur me auditimin e procesit të shitjeve me negocim direkt në Agjencinë Kosovare të Privatizimit,
Shqyrtimi i propozimit për ndryshimin dhe plotësimin e Vendimit të seancës plenare, nr.08-V-321, i datës 23 qershor 2022.
III. Pikat e papërfunduara nga Seanca plenare, e mbajtur më 20 prill 2023:
Shqyrtimi i Projektligjit nr.08/L-221 për ratifikimin e Marrëveshjes së kredisë dhe projektit ndërmjet Republikës së Kosovës, përfaqësuar nga Ministria e financave, punës dhe transfereve, KOSTT (Operator sistemi, transmisioni dhe tregu sh. a.) dhe KFË, Frankfurt Am Main (KFË) për Projektin -Zhvillimi i sektorit të energjisë VII – përmirësimi i rrjetit të transmetimit,
Shqyrtimi i Projektligjit nr.08/L-222 për ratifikimin e Marrëveshjes së kredisë në mes të Republikës së Kosovës dhe Bankës Evropiane për rindërtim dhe zhvillim për Projektin “Ngrohtorja solare e Prishtinës”,
Votimi në lexim të dytë i Projektligjit nr.08/L-184 për ndryshimin dhe plotësimin e Ligjit nr. 06/L-024 për trajtimin e ndërtimeve pa leje,
Shqyrtimi i Propozim-rezolutës për shpenzimet e parasë publike për dy vite mandat të Qeverisë së Republikës së Kosovës.
IV. Pika e papërfunduar nga Seanca e Jashtëzakonshme, e mbajtur më 26 prill 2023:
Votimi i Propozim Rezolutës nga debati parlamentar lidhur me zhvillimet në Korporatën Energjetike të Kosovës (KEK) dhe përgjegjësinë e institucioneve qendrore në sektorin energjetik.
V. Pikat e papërfunduara nga Seanca plenare, e mbajtur më 4 maj 2023:
6. Votimi i Projektligjit nr.08/L-223 për ratifikimin e Marrëveshjes për bashkëfinancimin e bursave të arsimit të lartë në nivelin master në mes Ministrisë së Arsimit, Shkencës, Teknologjisë dhe Inovacionit dhe Ambasadës së Francës në Prishtinë,
7. Votimi në lexim të dytë i Projektligjit nr. 08/L-153 për edukimin në fëmijërinë e hershme,
8. Shqyrtimi i parë i Projektligji nr.08/L-219 për ndryshimin dhe plotësimin e Ligjit nr.04/l-054 për statusin dhe të drejtat e dëshmorëve, invalidëve, veteranëve, pjesëtarëve të ushtrisë çlirimtare të Kosovës, personat e dhunuar gjatë luftës, viktimave civile dhe familjarëve të tyre, i ndryshuar dhe plotësuar me ligjin nr. 04/L-172,
9. Shqyrtimi i parë i Projektligjit nr.08/L-224 për ndryshimin dhe plotësimin e Ligjit nr. 06/L-005 për tatimin në pronën e paluajtshme,
10. Shqyrtimi i parë i Projektligjit nr.08/L-225 për Agjencinë e Inteligjencës dhe Sigurisë së Mbrojtjes,
11. Shqyrtimi i parë i Projektligjit nr.08/L-207 për tekstet shkollore,
12. Shqyrtimi i Vendimit të Qeverisë së Republikës së Kosovës nr.21/136, datë 22.03.2023 për themelimin e Kolegjit Publik Ndërkombëtar të Biznesit (IBCM) me seli në Mitrovicë si Institucion i arsimit të Lartë,
13. Shqyrtimi i rekomandimit lidhur me raportin e auditimit të performancës menaxhimi i projektit “Bashkimi i qytetit të Ferizajt”.