Stano: Masat ndaj Kosovës s’janë hequr pasi ende s’ka ndodhur deeskalimi kuptimplotë
(Lajm i përditësuar)
Zëdhënësi i BE-së për Politikë të Jashtme, Peter Stano, ka thënë se shtetet anëtare ende nuk kanë parë mjaftueshëm hapa nga Kosova për “një deeskalim kuptimplotë”, dhe kjo është arsyeja pse masat janë ende në fuqi.
Në një konferencë për media, Stano tha se sa i përket sulmit terrorist në Banjskë më 24 shtator, BE-ja pret një hetim të plotë dhe përfundimtar të ngjarjeve e po ashtu i ka bërë thirrje Serbisë që të bashkëpunojë pa kushte.
Stano për masat e mundshme ndaj Serbisë: Presim rezultatet e plota të hetimeve
Zëdhënësi i Bashkimit Evropian, Peter Stano, ka folur lidhur me masat e mundshme ndaj Serbisë pas agresionit të 24 shtatorit në Banjskë të Zveçanit.
“Kur bëhet fjalë për hetimet; duhet ta rikthesoj atë që e kemi thënë shumë herë deri tani: presim rezultatet e plota të hetimeve. Kur të jenë përfunduar hetimet dhe të kemi rezultatet që do t’i shoh BE-ja ne do ta kemi pamjen e qartë se çfarë ndodhi, kush qëndron prapa dhe atëherë BE-ja do të vendos për hapat e mëtejmë.
BE-ja ishte e qartë deri sa ka përshkallëzim ose deri sa të ketë më shumë eskalim ne jemi të gatshëm që të vendosim masa të caktuara si përgjigje ndaj kësaj. Disa nga masat janë vendosur tashmë. Ne jemi gjithashtu të gatshëm kur vendet anëtare të pajtohen që t’i konsiderojmë masat jo vetëm ndaj Kosovës por gjithashtu edhe ndaj Serbisë. Këto masa janë flekisibël ato mund të hiqen, mund të reduktohen në të njëjtën mënyrë siç mund të vendosen kur vendet anëtare të shohin se ka nevojë për to. Në këtë fazë ne kemi nevojë të shohim; e para, hapa drejt shtendosjes kuptimplote, kthim në dialog dhe kur bëhet fjalë për ngjarjet e 24 shtatorit hetime të plota dhe përfundimtare”, tha ai.
BE: Dialogu duhet të rikthehet. Pikë
Zëdhënësi i Bashkimit Evropian, Peter Stano, ka ftuar Kosovën dhe Serbinë që të kthehen në procesin e dialogut.
Sipas tij ky proces nuk ka alternativë tjetër, andaj edhe Prishtina edhe Beogradi duhet kthyer në tavolinën e bisedimeve.
“Nuk ka rrugë tjetër pos dialogut. BE është ndërmjetësues dhe palët duhet të kthehen në dialog për të gjetur koncensus. Rruga e Kosovës dhe Serbisë shkon përmes dialogut të ndërmjetësuar nga BE dhe aty nuk ka bajpas”, është shprehur Stano në konferencë.
“Të dyja palët duhet ta kuptojnë se dialogu duhet të rikthehet. Duhet të provohet për të gjetur zgjidhje për normalizim të marrëdhënieve. Këta janë hapat: shtensionim, kthim në dialog dhe hetim i ngjarjeve të 24 shtatorit. Dialogu duhet të rikthehet, palët të kthehen në tavolinë. Pikë”, ka thënë ai.