Stoltenberg: NATO do të ofrojë edhe më tej përkrahje të gjithanshme për Kosovën

 

Zyra e kryeministri të Kosovës sot ka informuar se kryeministri Avdullah Hoti, në kuadër të vizitës zyrtare në Bruksel është pritur në selinë e NATO-s nga Sekretari i Përgjithshëm i NATO-s, Jens Stoltenberg.

Me këtë rast, siç është theksuar, Hoti është shprehur se prania e NATO-s/KFOR-it është e një rëndësie të veçantë për forcimin e paqes dhe stabilitetit.

“Në këtë takim, në të cilin u bisedua për zhvillimet politike dhe ato të sigurisë në vendin tonë, kryeministri Hoti shprehu falënderimin e tij dhe të popullit të Kosovës për misionin e KFOR-it në Kosovë, duke theksuar se prania e NATO-s/KFOR-it, është e një rëndësie të veçantë për forcimin e paqes dhe të stabilitetit në këtë pjesë të Evropës Juglindore.”, është bërë e ditur në komunikatë.

Kryeministri Hoti e ka falënderuar sekretarin Stoltenberg edhe për ndihmën që u ka dhënë KFOR-i institucioneve të Republikës së Kosovës për menaxhimin e pandemisë COVID-19.

“Duke e vlerësuar rolin e Aleancës Veriatlantike për paqen dhe stabilitetin ndërkombëtar, kryeministri Hoti, sipas komunikatës, ka theksoi përkushtimin e Kosovës për ndërtimin e një të ardhmeje euroatlantike dhe synimin që Kosova sa më parë të bëhet anëtare e NATO-s.”, është bërë e ditur në komunikatë.

Ndërsa, Sekretari Stoltenberg ka thënë se NATO-ja do të ofrojë edhe më tej përkrahje të gjithanshme për Kosovën, për të siguruar një mjedis paqësor dhe një të ardhme të sigurt për të gjithë qytetarët e saj.

Po ashtu, kryeministri e ka ftuar sekretarin Stoltenberg të vizitojë Kosovën, sa më parë që t’i jepet rasti./21Media