Studentët indianë dhe afrikanë thonë se po përballen me racizëm në kufi

Ndërsa pushtimi rus i Ukrainës vazhdon, studentët e huaj që tentojnë të largohen nga vendi thonë se po përjetojnë trajtim racist nga forcat ukrainase të sigurisë dhe zyrtarët e kufirit.
Rachel Onyegbule, një studente nigeriane e vitit të parë të mjekësisë në Lviv, i tha CNN se ajo dhe të huajt e tjerë u urdhëruan të dilnin nga autobusi i transitit publik në një pikë kontrolli midis kufirit me Ukrainën dhe Poloninë. Atyre iu tha të qëndronin mënjanë ndërsa autobusi u nis me vetëm shtetas ukrainas në bord.
Ajo mbeti e bllokuar në qytetin kufitar Shehyni, rreth 400 milje nga kryeqyteti i Ukrainës, Kiev, përcjellë rtv21.tv
“Erdhën më shumë se 10 autobusë dhe ne po shikonim të gjithë të largoheshin. Ne menduam se pasi morën të gjithë ukrainasit do të na merrnin, por ata na thanë se duhej të ecnim në këmbë, se nuk kishte më autobusë dhe na thanë të ecnim,” tha ajo.
“Trupi im ishte i mpirë nga i ftohti dhe ne nuk kemi fjetur për rreth katër ditë tani. Ukrainasve u është dhënë prioritet mbi afrikanët, burrat dhe gratë, në çdo moment. Nuk ka nevojë që ne të pyesim pse. Ne e dimë pse. Unë thjesht dua të shkoj në shtëpi”, shtoi ajo.
Onyegbule tha se ajo përfundimisht mori dokumentin e saj të daljes të vulosur të hënën në mëngjes rreth orës 04:30.
Saakshi Ijantkar nga India, studente e vitit të katërt të mjekësisë gjithashtu ndau përvojën e saj të hidhur me CNN përmes një telefonate nga Lviv, në Ukrainën perëndimore.
“Ka tre postblloqe nëpër të cilat duhet të kalojmë për të arritur në kufi. Shumë njerëz janë të bllokuar atje. Ata nuk i lejojnë indianët të kalojnë”, tha ajo.
CNN nuk ka qenë në gjendje të konfirmojë identitetin ose përkatësinë e njerëzve që drejtonin pikat e kontrollit, por Ijantkar tha se të gjithë kishin veshur uniforma.
“Ata lejojnë 30 indianë vetëm pasi të hyjnë 500 ukrainas. Për të arritur në këtë kufi duhet të ecësh 4 deri në 5 kilometra nga pika e parë e kontrollit në të dytin. Ukrainasve u jepen taksi dhe autobusë për të udhëtuar, të gjitha kombësitë e tjera duhet të ecin në këmbë. Ata ishin shumë racistë ndaj indianëve dhe kombësive të tjera”, tha 22 vjeçarja nga Mumbai.
Ajo shtoi se ishte dëshmitare e dhunës nga rojet ndaj studentëve që prisnin në anën ukrainase të kufirit Shehyni-Medyka.
“Pashë një burrë egjiptian duke qëndruar në pjesën e përparme me duart në shina, dhe për shkak të kësaj një roje e shtyu me aq shumë forcë dhe burri goditi gardhin, i cili ishte i mbuluar me thumba, dhe ai humbi vetëdijen”, tha ajo.
“Ne e nxorëm jashtë për t’i dhënë CPR. Ata thjesht nuk u interesuan dhe po rrihnin studentët”, shtoi Ijantkar.
Ukraina tërheq shumë studentë të huaj që duan të studiojnë mjekësi, sepse ka një reputacion të fortë për kurset dhe shkollimin mjekësor – dhe shpenzimet e tjera janë shumë më të ulëta se në programet në vendet e tjera perëndimore./21Media