Sylejman Selimi sot ka dhënë deklaratën e tij për Gjykatën Speciale

Edhe Selimi i ftuar nga Gjykata Speciale

Avokati i ish -Gjeneralit të UÇK-së, Sylejman Selimit, Tomë Gashi para disa jave pat deklaruar se si ekip i avokatëve janë duke negociuar me Zyrën e Prokurorit Special për intervistimin e Sylejman Selimit në Prishtinë për një datë të papërcaktuar për shkak të problemeve shëndetësore.

Ndërsa, sot përmes një postimi në Facebook avokati, Gashi  ka deklaruar se Selmi sot ka dhënë deklaratën e tij për Gjykatën Speciale në Prishtinë.

Gashi ka njoftuar se sot prej orës 14:00 do të mbajë konferencë për media bashkë me avokatin, Gergor Guy Smith.

Ish-komandanti i Ushtrisë Çlirimtare Sylejman Selimi është liruar nga burgu me 25 janar. Selimi ishte arrestuar në maj të vitit 2013 dhe ishte shpallur fajtor për vepër penale të krimeve të luftës kundër popullatës civile nga Gjykata Themelore në Mitrovicë më 27 maj 2015 duke u dënuar më 6 vjet burg.

Gjithsej, njëmbëdhjetë ish-luftëtarë të UÇK-së, në mesin e tyre edhe Sami Lushtaku, Rrustem Mustafa janë ftuar për intervistë nga Prokuroria e Specializuar. Formimi i Gjykatës Speciale ka pasuar një raport të Këshillit të Evropës në vitin 2011, i cili ka konstatuar se ka prova të mjaftueshme për të nisur hetime kundër disa ish-pjesëtarëve të UÇK-së, që dyshohet se kanë kryer krime kundër serbëve dhe disa shqiptarëve, gjatë dhe pas luftës në Kosovë. Gjykata Speciale do t’i trajtojë krimet e supozuara që përfshijnë periudhën janar 1998 – dhjetor 2000.  21Media