Trajneri i Zvicrës: Mezi pres përballjen me Kosovë

Zvicra ishte shumë me fat në shortin për kualifikimin për Kampionatin Evropian 2024 në Gjermani. Pa diskutim: Zvicra është favorit i qartë në Grupin I. Zviceranët takohen me Kosovën, Izraelin, Rumaninë, Bjellorusinë dhe Andorrën. Dy skuadrat e para në grup kualifikohen direkt në Euro 2024.
Për trajnerin e kësaj kombëtareje Murat Yakin, lidhja me Izraelin ka një kuptim të veçantë, pasi ai luajti ndeshjen e fundit ndërkombëtare kundër izraelitëve si lojtar profesionist.
“Mendoj se Izraeli është kundërshtari më i fortë në këtë grup”, thotë Yakin, duke shtuar se edhe dueli vëllazëror me Kosovën sigurisht që do të jetë shumë i veçantë.
“Sigurisht që kemi shumë miq kosovarë në Zvicër, mezi po e presim duelin”, shpjegon Yakin.
Dy ndeshjet kundër Kosovës do të jenë gjithashtu shumë të veçanta për shumë lojtarë të lidhur me të dyja vendet. Në anën zvicerane, Xherdan Shaqiri dhe Granit Xhaka i kanë rrënjët në Kosovë. Nga ana kosovare, në skuadër janë lojtarë si Florent Hadergjonaj dhe Fidan Aliti, të cilët janë rritur në Zvicër.