Trump bisedon me liderët evropianë dhe Zelenskyn për Ukrainën
(Lajm i përditësuar)
Trump ndërpreu takimin për të telefonuar Putinin
Trump ndërpreu takimin me Zelenskyn dhe udhëheqësit evropianë për të telefonuar Presidentin rus Vladimir Putin, sipas raportimeve nga mediat gjermane dhe amerikane.
Më parë, Trump tha se do ta telefononte Putinin pas takimit dhe gjithashtu zbuloi se dyshja kishte komunikuar indirekt më herët sot.
Por disa media kanë raportuar se Trump kontaktoi presidentin rus ndërsa negociatat ishin ende në vazhdim në Shtëpinë e Bardhë, duke cituar burime të paidentifikuara me njohuri për bisedimet.
Shtëpia e Bardhë nuk ka komentuar mbi telefonatën e raportuar me Putinin./21Media
Trump dhe Zelensky vazhdojnë bisedimet
Burime në delegacionin ukrainas në Shtëpinë e Bardhë i thanë BBC-së se presidentët Trump dhe Zelensky janë ende në ndërtesë për bisedime të mëtejshme – “ndoshta në një format të ndryshëm”.
Burimet thonë gjithashtu se intervista e planifikuar më parë e Zelensky-t me Fox News është anuluar./21Media
Trump: Pas një apo dy javëve do ta dimë nëse kemi gjetur zgjidhje
Presidenti amerikan, Donald Trump, tha se javët në vijim do të tregojnë nëse është arritur përparim për t’i dhënë fund luftës së Rusisë në Ukrainë.
“Mendoj se presidenti Putin dëshiron gjithashtu të gjejë një përgjigje, dhe do të shohim”, tha Trump.
“Në një periudhë të caktuar kohore, jo shumë larg, një ose dy javë, do ta dimë nëse do ta zgjidhim këtë ose nëse kjo luftë e tmerrshme do të vazhdojë”, theksoi ai.
Pasi pjesa publike e takimit të tyre përfundoi, Trump i takoi privatisht liderët evropianë dhe Zelenskyn.
Trump thotë se marrëveshja e paqes është “shumë e arritshme”
Ndërsa Presidenti Donald Trump tha se një armëpushim midis Rusisë dhe Ukrainës është i preferueshëm, ai vuri në pikëpyetje nëse “është i nevojshëm”, duke qenë se beson se një marrëveshje më e gjerë paqeje mund të realizohet në “të ardhmen e afërt”.
“Të gjithë ne padyshim do të preferonim një armëpushim të menjëhershëm ndërsa punojmë për një paqe të qëndrueshme. Dhe ndoshta diçka e tillë mund të ndodhë. Që nga ky moment, kjo nuk po ndodh”, tha Trump ndërsa ishte ulur së bashku me udhëheqësit evropianë në Shtëpinë e Bardhë. Ai shtoi se Presidenti ukrainas Volodymyr Zelensky dhe Presidenti rus Vladimir Putin mund ta diskutojnë këtë çështje.
“Nuk e di nëse është e nevojshme”, tha Trump. “Më pëlqen armëpushimi. Nga një këndvështrim tjetër, ndaloni menjëherë vrasjet. Por unë besoj se një marrëveshje paqeje në fund të gjithë kësaj është diçka shumë e arritshme dhe mund të bëhet në të ardhmen e afërt”.
Gjatë rrugës për në Alaska për t’u takuar me Putinin javën e kaluar, Trump tha: “Dua të shoh një armëpushim të shpejtë. Nuk e di nëse do të ndodhë sot, por nuk do të jem i lumtur nëse nuk ndodh sot.”
Pas takimit në Alaskë, Trump u tërhoq nga përpjekjet e tij për një armëpushim, duke kërkuar në vend të kësaj një marrëveshje të plotë paqeje – e cila mund të zgjasë shumë më tepër për t’u arritur./21Media
Kancelari gjerman thotë se rruga është e hapur për negociata më serioze
“Rruga është e hapur” për negociata më serioze mbi konfliktin midis Rusisë dhe Ukrainës, tha kancelari gjerman Friedrich Merz gjatë një takimi me Presidentin e SHBA-së Donald Trump dhe Presidentin ukrainas Volodymyr Zelensky në Shtëpinë e Bardhë.
Merz tha se Trump e hapi atë rrugë pasi presidenti amerikan u takua me presidentin rus Vladimir Putin në Alaska të premten.
“Tani rruga është e hapur për negociata të ndërlikuara”, tha ai.
Merz përsëriti se udhëheqësit evropianë mezi presin një armëpushim përpara se të zhvillohen bisedime të mëtejshme.
“Nuk mund ta imagjinoj që takimi i ardhshëm do të zhvillohet pa një armëpushim”, tha ai. “Prandaj, le të punojmë për këtë”./21Media
Zelensky thotë se pati bisedë “shumë të mirë” me Trumpin
Presidenti ukrainas, Volodymyr Zelensky, tha se pati një “bisedë shumë të mirë” me presidentin amerikan, Donald Trump, para takimit të tyre shumëpalësh me liderët e tjerë evropianë.
“Mendoj se pata një bisedë shumë të mirë me presidentin Trump”, tha ai, duke shtuar se “diskutuam pika shumë delikate”.
Lideri ukrainas falënderoni vazhdimisht Trumpin për takimin me të.
Ai shtoi se Trumpi po përpiqet ta organizojë një takim trepalësh dhe se Ukraina do të ishte e lumtur nëse ai do të merrte pjesë.
Ai gjithashtu nënvizoi se i ka treguar Trump “shumë hollësi” mbi një hartë të fushës së betejës.
Nis takimi mes Trumpit dhe liderëve evropianë
Një takim shumëpalësh sapo ka filluar mes presidentit amerikan, Donald Trump, dhe liderëve evropianë, në Shtëpinë e Bardhë.
Presidenti amerikan, Donald Trump, i falënderoi liderët e pranishëm evropianë dhe tha se është nder t’i ketë ata në Shtëpinë e Bardhë.
Ai tha se ka qenë një ditë shumë e suksesshme.
“Duam t’i ndalojmë vrasjet dhe ta zgjidhim këtë”, tha ai për luftën mes Rusisë dhe Ukrainës.
Ai shtoi se sapo pati nderin të jetë me Zelenskyn dhe diskutimet e tyre “përfshinë shumë çështje”.
Zelensky: Ukraina ka nevojë për “të gjithë” mbështetjen nga SHBA-ja
Presidenti ukrainas Volodymyr Zelensky u pyet në Shtëpinë e Bardhë se çfarë i duhet vendit të tij nga Shtetet e Bashkuara për të garantuar sigurinë e Ukrainës: Trupa, informata të inteligjencës, apo pajisje?
“Të gjitha”, u përgjigj Zelensky.
Ukraina ka nevojë për një ushtri të fortë ukrainase. Bëhet fjalë për armë, personel, misione trajnimi, informata të inteligjencës, tha ai.
Ai tha se do ta diskutojë këtë me “partnerët tanë”, “vendet e mëdha”, duke përfshirë SHBA-në.
Trump thotë se Putini e “pret telefonatën time” pas takimeve
Presidenti amerikan Donald Trump tha se sapo ka folur me homologun e tij rus, Vladimir Putini, në mënyrë indirekte, duke shtuar se do ta ketë një bisedë telefonike me të më vonë.
“Sapo kam folur me presidentin Putin në mënyrë indirekte, dhe do të kemi një bisedë telefonike menjëherë pas këtyre takimeve sot, dhe mund të kemi ose jo një takim trepalësh”, tha Trump.
Trump shtoi se Putini “po pret thirrjen time kur të përfundojmë këtë takim”.
Trump s’e përjashton mundësinë e dërgimit të trupave amerikane në Ukrainë si pjesë e garancive të sigurisë
Presidenti amerikan, Donald Trump, nuk e ka përjashtuar mundësinë e dërgimit të trupave amerikane në Ukrainë për të ndihmuar në ruajtjen e një marrëveshjeje të mundshme për paqe.
“Do t’ju njoftojmë, ndoshta më vonë sot”, tha Trump.
Trump tha se Evropa do të jetë ajo që udhëheq përpjekjet për sigurimin e paqes, por se SHBA do të jetë e përfshirë.
“Ata janë vija e parë e mbrojtjes, sepse janë aty, Evropa. Por, ne do t’i ndihmojmë. Gjithashtu, do të jemi të përfshirë”, tha ai.
Trump tha se nëse arrihet marrëveshje për paqe, ajo do të jetë e qëndrueshme.
“Unë mendoj se nëse arrijmë paqen, ajo do të funksionojë. Nuk kam asnjë dyshim për këtë”, tha ai.
Trump mirëpret Zelenskyn në Shtëpinë e Bardhë
Presidenti Donald Trump priti Presidentin ukrainas Volodymyr Zelensky në Shtëpinë e Bardhë përpara takimit të tyre dypalësh.
Presidenti ukrainas Volodymyr Zelensky mbërriti në Shtëpinë e Bardhë të hënën i veshur me veshje më formale sesa veshja e tij e zakonshme ushtarake, por nuk veshi një kostum të plotë dhe kravatë.
Ndërsa Presidenti Donald Trump po mirëpriste Volodymyr Zelensky të Ukrainës në Krahun Perëndimor, një gazetar e pyeti se cili është mesazhi i tij për ukrainasit.
“Ne i duam ata”, tha Trump, përpara se të hynte në ndërtesë me mysafirin e tij./21Media
Zelensky thotë se qëllimi kryesor është paqja e besueshme dhe e qëndrueshme për Ukrainën dhe Evropën
Presidenti ukrainas Volodymyr Zelensky thotë se qëllimi i takimit të së hënës me Presidentin e SHBA-së Donald Trump është një “paqe e besueshme dhe e qëndrueshme” për vendin e tij dhe të gjithë Evropën.
Ai tha në emisionin X se SHBA-të, Evropa dhe të tjerët duhet të ushtrojnë presion mbi presidentin e Rusisë, duke thënë se askush nuk duhet të presë që Vladimir Putin të heqë dorë vullnetarisht nga agresioni dhe përpjekjet e reja për pushtim.
Zelensky shtoi se ai dhe aleatët evropianë kanë koordinuar qëndrimet e tyre përpara takimit me Trump./21Media
Udhëheqësit evropianë mbërrijnë në Shtëpinë e Bardhë përpara takimit shumëpalësh me Trumpin
Udhëheqësit evropianë kanë filluar të mbërrijnë në Shtëpinë e Bardhë të hënën pasdite, përpara takimit shumëpalësh me Presidentin Donald Trump.
Sekretari i Përgjithshëm i NATO-s, Mark Rutte, ishte udhëheqësi i parë që mbërriti në ambientet e Shtëpisë së Bardhë të hënën. Ai u prit nga Shefja e Protokollit, Monica Crowley.
Së bashku me Rutte-n, Presidentja e Komisionit Evropian Ursula von der Leyen, Kryeministri britanik Keir Starmer, Presidenti francez Emmanuel Macron, Kancelari gjerman Friedrich Merz, Kryeministrja italiane Giorgia Meloni, Presidenti finlandez Alexander Stubb dhe Presidenti ukrainas Volodymyr Zelensky pritet të marrin pjesë të gjithë në takimet me Trump sot./21Media
Trump thotë se është një “ditë e madhe në Shtëpinë e Bardhë”
Presidenti Donald Trump e quajti të dielën një “ditë të madhe në Shtëpinë e Bardhë” përpara takimeve të tij me Presidentin ukrainas Volodymyr Zelensky dhe disa udhëheqës evropianë.
“Një ditë e madhe në Shtëpinë e Bardhë. Nuk kemi pasur kurrë kaq shumë udhëheqës evropianë këtu në të njëjtën kohë. Një nder i madh për Amerikën!!! Le të shohim se cilat do të jenë rezultatet”, shkroi presidenti në Truth Social.
Në prag të takimeve, Trump tha se Zelensky duhet të bjerë dakord me disa nga kushtet e Rusisë – duke përfshirë që Ukraina të heqë dorë nga Krimea dhe të pranojë të mos bashkohet kurrë me NATO -n – që lufta të përfundojë.
Në samitin e javës së kaluar me Trump, Presidenti rus Vladimir Putin ra dakord të lejojë garanci sigurie për Ukrainën dhe disa lëshime mbi kërkesat e tij për tokën si pjesë e një marrëveshjeje të mundshme paqeje, tha për CNN i dërguari i SHBA-së Steve Witkoff. Por Rusia ende nuk i ka përmendur marrëveshje të tilla, dhe Zelensky ka sugjeruar se garanci të tilla do të duhet të jenë më të forta se ato që “nuk funksionuan” në të kaluarën./21Media