Vajzat e Kosovës udhëtojnë në Qipro për Kampionatin Evropian

1 min read

Pas disa javësh përgatitje, Përfaqësuesja e Kosovës A te femrat, të hënën ka udhëtuar drejt Qipros për Kampionatin Evropian për Shtete të Vogla, që mbahet në Qipro nga 28 qershori deri më 3 korrik.

Kjo është hera e dytë që vajzat e Kosovës marrin pjesë në një garë të tillë. Vitin e kaluar u stolisën me medaljen e bronztë, kurse këtë vit kanë udhëtuar me ambicie më të mëdha.

Përgatitjet kanë shkuar sipas planit dhe atmosfera në Përfaqësuesen e Kosovës ishte shumë e mirë. Ekipi përbëhet nga lojtare me përvojë dhe ato të reja, ndërsa basketbollistet janë shprehura të motivuara dhe të gatshme të japin gjithçka nga vetja për të përfaqësuar sa më mirë shtetin në garat ndërkombëtare.

Vajzat Dardane në ndeshjen e parë ballafaqohen me Maltën më 28 qershor, kurse më 29 qershor përballen me Andorrën. Më 30 qershor, Kosova do të zhvillojë ndeshjen e parafundit me Qipron, kurse sfidën e fundit e zhvillon më 2 korrik ndaj Norvegjisë.

Ndeshja ndaj Maltës zhvillohet të martën nga ora 17:30.